Barbie er nú sögð stuðla að eyðileggingu regnskóga og ógna dýrategundum í útrýmingarhættu. Reuters

Umhverfisverndarsamtökin Greenpeace hafa sakað Mattel, fyrirtækið sem framleiðir brúðuna Barbie, um að stuðla að eyðileggingu skóga í Indónesíu og ógna heimkynnum dýrategunda í útrýmingarhættu, þar á meðal Sumatran tígrisdýra, fíla og apa.

Samtökin segja að umbúðir sem notuð eru í pökkun á Barbie og Ken brúðunum innihaldi timburafurðir frá fyrirtækinu Asia Pulp and Paper. Segja samtökin að fyrritækið sé þekkt fyrir þátttöku sína í eyðileggingu skóga.

„Barbie eyðileggur náttúrulega skóga og ógnar dýrategundum í útrýmingarhættu,“ sagði Bustar Maitar hjá Greenpeace.

„Mattel, sem framleiðir Barbie, verður að hætta að pakka frægasta leikfangi heimsins inn í regnskóga sem eru að hverfa.“

Fyrirtækið Asia Pulp and Paper sagði að ásakanirnar kæmu á óvart og neitaði að framleiðsluaðferðir þess ógnaði á einhvern hátt skógum eða dýrategundum. Mattel sagði að það reyndi yfirleitt að vinna með sjálfbærar afurðir sem birgjar fyrirtækisins mæltu með.

Indónesía er talið vera eitt af þeim löndum sem losar hvað mest af gróðurhúsategundum, aðallega vegna skógareyðingar. Vegna timburframleiðslu og byggingu kolanáma og verksmiðja er skógareyðing mikil.

Herferð Greenpeace gegn Mattel er í takt við aðrar herferðir samtakanna gegn fyrirtækja á borð við Walmart, Carrefor og Tesco. Í kjölfar herferðanna hafa nokkur fyrirtæki hætt viðskiptum við Asia Pulp and Paper.

Greenpeace vill að leikfangaframleiðandinn Mattel hugi að hvers konar umbúðir það notast við í framleiðslu sinni. Reuters