Bandarískur dómari hefur dæmt fyrrum fjölmiðlakonunginn Conrad Black aftur í fangelsi fyrir fjársvik og fyrir að hindra framgang réttvísinnar. Talið er að hann muni þó aðeins sitja á bak við lás og slá í 13 mánuði vegna þess tíma sem hann hefur þegar afplánað.

Black og þrír aðrir stjórnendur fjölmiðlafyrirtækisins Hollinger International voru fundnir sekir árið 2007 um að svíkja 6,1 milljón dala út úr hluthöfum fyrirtækisins. 

Honum var sleppt árið 2010 eftir að hæstiréttur Bandaríkjanna komst að þeirri niðurstöðu að spillingarlöggjöf, sem hann var dæmdur eftir, hafi andstæð stjórnarskrá landsins. Hann var þá búinn að afplána rúm tvö ár af sex og hálfs árs dómi sem hann hlaut.

Aðrar ákærur stóðu hins vegar.

Í dag komst héraðsdómari í Chicago að þeirri niðurstöðu að Black hefði verið sleppt of snemma úr fangelsi í fyrra. Dómarinn sagði að Black hefði þurft að sitja lengur á bak við lás og slá áður en honum yrði veitt frelsi, að því er segir á vef breska útvarpsins. 

Á hátindi valda sinna átti Black The Daily Telegraph, eitt virtasta dagblað í Bretlandi auk fjölda annarra blaða bæði í Bandaríkjunum, Kanada og í Ísrael. Hann var um skeið einn helsti stuðningsmaður Margrétar Thatcher, var veitt lávarðartign í Bretlandi, og í stjórnum fyrirtækja hans sátu þekktir menn á borð við Henry Kissinger