Frá San Fermín-hátíðinni í Pamplona í fyrra. ELOY ALONSO

Fjórir eru slasaðir eftir nautahlaup á fyrsta dag San Fermín-hátíðarinnar í borginni Pamplona á Norður-Spáni í dag. Hundrað hlaupamanna hlupu með sex risastórum bardaganautum og þremur ungnautum um mjó stræti borgarinnar. Stendur hátíðin yfir í viku.

Þrír Spánverjar og einn Panamamaður slösuðust lítillega og var gert að sárum þeirra á sjúkrahúsi eftir hlaupið. Er leiðin sem hlaupin er tæpir 850 metrar og endar í nautaatshring borgarinnar. Tók hlaupið í dag um tvær og hálfa mínútu að sögn skipuleggjenda hátíðarinnar.

Stendur hátíðin til 14. júlí og fylgir henni yfirleitt mikil ölvun gesta og er það árlegur viðburður að menn slasist í nautahlaupunum sem öðluðust heimsfrægð eftir að Ernest Hemingway skrifaði um þau í bókinni Og sólin rennur upp.

Búist er við því að yfir milljón manns taki þátt í hátíðarhöldunum í ár þó að ekki gerist allir svo djarfir að hlaupa með nautunum. Í fyrra voru gestir um 1,5 milljónir en um 200 þúsund manns búa í Pamplona. Ár hvert slasast um 200 til 300 manns, flestir af því að detta í hlaupinu en sumir verða undir nautunum eða eru stungnir.

Síðasta banaslys á hátíðinni varð fyrir tveimur árum þegar 27 ára gamall Spánverja var rekinn á hol. Fór horn nauts í gegnum háls hans, hjarta og lungu.

Á kvöldin er nautunum slátrað í nautaatshringnum og er boðið upp á kjötið á veitingahúsum borgarinnar.