Rupert Murdoch, forstjóri News Corp. Reuters

Sjö bresk dagblöð birtu í dag afsökunarbeiðni fjölmiðlakóngsins Rupert Murdoch, en þar biðst hann afsökunar á símahleranahneykslinu svokallaða, sem hefur dregið margvíslegan dilk á eftir sér.

Fyrirsögn afsökunarbeiðninnar var: „We are sorry“ eða „Við biðjumst afsökunar“. Þar er beðist afsökunar á „þeim alvarlegu misgjörðum sem áttu sér stað og þeim særindum sem þær hafa valdið fólki.“ Ennfremur er beðist afsökunar á því að hafa ekki brugðist fyrr við.

Afsökunin er undirrituð „Í einlægni, Rupert Murdoch.“

Síðustu helgi var útgáfu sunnudagsblaðsins News of the World hætt vegna þessa máls og tveir af lykilstarfsmönnum Murdochs hafa tekið pokann sinn; þau Les Hinton, sem hafði unnið fyrir hann í 52 ár og  Rebekah Brooks.

Aukinheldur hefur kastljósið beinst að  David Cameron, forsætisráðherra Bretlands, en í ljós hefur komið að hann átti 26 fundi á 15 mánuðum með nánum samstarfsmönnum Murdochs og þykir það benda til þess að Murdoch hafi haft mikil áhrif á bak við tjöldin innan breskra stjórnmála.

Breska ríkisstjórnin hefur tilkynnt um að fram muni fara rannsókn á málinu. Þar verða meðal annars kannaðar ásakanir þess efnis að lögreglumenn hafi þegið mútugreiðslur frá blaðinu og tengsl News of the World við stjórnmálamenn könnuð.

Málið hefur nú einnig teygt anga sína til Bandaríkjanna, en FBI hefur hafið rannsókn á ásökunum um að starfsmenn Murdochs í Bandaríkjunum hafi brotist inn í síma fólks sem lést í hryðjuverkaárásunum þann 11. september 2011.