Erlent | mbl | 24.7.2011 | 9:52

Faðir og bróðir Breiviks unnu í ráðuneytum

Bóndabærinn sem Breivik leigði á Hedmark. Reuters

Faðir og bróðir Anders Behrings Breiviks, sem nú hefur játað á sig fjöldamorðin í Noregi á föstudag, störfuðu í ýmsum ráðuneytum, sem eru til húsa þar sem Breivik sprengdi öfluga sprengju á föstudag.

Þetta kemur fram á vef TV2 í Noregi. Faðir Breiviks starfaði í utanríkisráðuneytinu og viðskipta- og atvinnumálaráðuneytinu í mörg ár en hálfbróðir hans vann í olíu- og orkumálaráðuneytinu og viðskipta- og atvinnumálaráðuneytinu.

Að minnsta kosti sjö létu lífið þegar sprengjan sprakk utan við olíu- og orkumálaráðuneytið á föstudag.

Breivik ólst upp í vesturhluta Óslóar, fyrst við Hoffsveien í Nedre Silkestrå og síðan við Konventveien skammt fra. Hann bjó einnig við Maries götu í Majorstua og við Tidemanns götu á Frogner. Árið 2006 flutti hann aftur til móður sinnar á Hoffsveien en um síðustu mánaðamót flutti hann lögheimili sitt til afskekkts bóndabæjar skammt frá Rena á Hedmark, norður af Ósló.

TV2 segir, að nágrannar lýsi Breivik sem kurteisum, feimnum, víðlesnum og gáfuðum manni sem virtist einangrast æ meir framan við tölvuna á síðustu árum. Þar tók hann þátt í umræðum og tölvuleikjum á netinu og í gær kom í ljós að hann var einnig að semja 1500 blaðsíðna langa stefnuskrá þar sem hann útskýrir ástæður sínar fyrir hryðjuverkunum sem hann framdi á föstudag.

Breivik er félagi í frímúrarareglunni og sagðist sjálfur vera kristinn og íhaldsmaður. Hann tók um tíma þátt í starfi Framfaraflokksins.

Norska lögreglan handtók Breivik eftir að hann hafði skotið 85 manns til bana á Utøya. Lögregla segir, að Breivik hafi gefist upp um leið og hann var beðinn um að leggja frá sér byssuna. Hann var þá orðinn skotfæralaus.