Frá fundarsal öryggisráðs Sameinuðu þjóðanna. Reuters

Öryggisráð Sameinuðu þjóðanna ræddi blóðbaðið í Sýrlandi á ný í dag. Litlar vonir eru þó bundnar við að samþykkt verði ályktun þar sem ofbeldið er fordæmt eins og margar þjóðir vilja að ráðið geri.

Rússar og Indverjar segja að drög að ályktun um Sýrland sem Evrópuþjóðir hafi dreift til fulltrúa ráðsins sé nánast samhljóða þeim drögum sem ráðið hefur hafnað undanfarna tvo mánuði.

„Afstaða okkar er afar skýr, ég held að ráðið verði að tjá sig. Á hvaða hátt það gerir, hvernig og með hvaða áherslu þarf að ræða,“ segir Hardeen Singh Puri, fulltrúi Indlands í ráðinu sem jafnframt fer með forsæti þess í ágúst.

Kínverjar og Rússar, sem hafa neitunarvald í ráðinu, hafa áður hótað því að koma í veg fyrir að ráðið álykti um Sýrland. Brasilíumenn, Indverjar og Suður-Afríkumenn hafa einnig talað gegn ályktun eða yfirlýsingu af hálfu ráðsins.

Í kjölfar ofbeldisins um helgina þar sem á annað hundrað manns féllu í árásum hersins á borgara hafa öll löndin sem eiga sæti í öryggisráðinu lýst yfir áhyggjum að stöðu mála og að almennt sé litið svo á að ráðið þurfi að bregðast við.

Talið er líklegt að öryggisráðið reyni nú að koma sér saman um vægari yfirlýsingu um málefni Sýrlands án þess að minnast á hugsanlegar aðgerðir Sameinuðu þjóðanna.