Francois Baroin, fjármálaráðherra Frakklands Reuters

Frakkar hafa fulla trú á styrk bandarísks hagkerfis segir Francois Baroin, efnahagsráðherra Frakklands. Hann er fyrsti evrópski ráðherrann sem bregst opinberlega við lækkun lánshæfismats Bandaríkjanna.

„Frakkland hefur trú á styrk og grunnstoðum bandaríska hagkerfisins, og á vilja stjórnvalda til þess að framfylgja áætluninni um lækkun skulda, sem þingið samþykkti í vikunni,“ sagði hann.

Lánshæfismatsfyrirtækið Standard & Poor's lækkaði í nótt lánshæfiseinkunn Bandaríkjanna úr AAA, hæstu mögulegu einkunn, í AA+.

„Einkunn S&P er aðeins einn þáttur í heildarmatinu á efnahagslegri stöðu Bandaríkjanna. Ég bendi á að hin matsfyrirtækin, Moody's og Fitch, hafa staðfest AAA-einkunn. Þetta vekur upp spurningar um ákvörðun sem byggir á gögnum sem eining ríkir ekki um,“ segir Baroin.

Samkvæmt fjármálaráðuneyti Bandaríkjanna gerðu S&P mistök í útreikningum sínum sem leiddu til þess að vænt skuldaaukning var ofmetin um tvær billjónir dala.

Þrátt fyrir þetta segir Baroin ákvörðun S&P staðfesta það að „öll stærstu iðnríkin standa í dag frammi fyrir sama vandanum: að örva þarf vöxt og draga úr skuldum opinbera geirans sem og einkageirans.“