Barack Obama Bandaríkjaforseti ásamt þeim John Boehner, leiðtoga fulltrúadeildarinnar (t.v.) og Harry Reid, leiðtoga öldungadeildarinnar. Reuters

Lánshæfismatsfyrirtækið Standard & Poor's tengir lækkun lánshæfiseinkunnar Bandaríkjanna við þráteflið í stjórnmálum landsins. Málamiðlunin sem gerð var á þriðjudag til þess að koma í veg fyrir greiðslufall „er ekki nóg til þess, að okkar mati, að koma á stöðugleika í skuldaþróuninni til meðallangs tíma,“ segir í yfirlýsingu fyrir fyrirtækinu.

„Ennfremur endurspeglar lækkunin þá skoðun okkar að dregið hafi úr skilvirkni, stöðugleika og fyrirsjáanleika bandarískrar stefnumótunar og að stofnanir stjórnkerfisins hafi veikst eftir því sem efnahagsvandinn hefur aukist.“

S&P segir hinar neikvæðu horfur vísa til þess möguleika að lánshæfiseinkunnin verði lækkuð í AA (úr AA+) innan tveggja ára ef dragi úr pólitískum vilja til þess að skera niður eða efnahagsaðstæður versni.

„Okkar skoðun er sú að kjörnir fulltrúar veigri sér við að takast á við hinn kerfislæga vanda með þeim hætti sem sæmir landi með einkunnina AAA,“ segir í yfirlýsingunni.

S&P er almennt álitið áhrifamest matsfyrirtækjanna þriggja. Hin fyrirtækin tvö, Moody's og Fitch Ratings, sögðust bæði fylgjast með baráttu Bandaríkjanna við hallareksturinn með niðurfærslu í huga.

S&P varaði Bandaríkjastjórn fyrst við mögulegri lækkun í apríl á þessu ári. Í júlí, þegar hanaslagur Obama og Repúblikana var að komast í hámæli, setti S&P Bandaríkin á athugunarlista og varaði við lækkun innan 90 daga. Beðið yrði með ákvörðun þar til ljóst yrði hver niðurstaða viðræðnanna yrði.

Samkomulagið sem náðist í byrjun vikunnar felur í sér 917 milljarða dala lækkun skulda á tíu árum, en fól einnig óskipaðri þingnefnd að gera tillögur að 1.500 milljarða niðurskurði til viðbótar. Áætlun nefndarinnar á að liggja fyrir undir lok árs.

Í augum S&P dugði þetta ekki til þess að halda AAA-einkunninni. Fyrirtækið hafði vonast eftir fjögur þúsund milljarða aðgerðaáætlun sem fæli bæði í sér niðurskurð og skattalækkanir. Þingflokkar gátu hins vegar ekki komið sér saman um neitt í líkingu við það.

John Chambers, formaður þjóðarskuldbindinganefndar S&P, segir að getuleysi stjórnmálamanna hafi ráðið lækkun einkunnarinnar. „Það fyrsta sem þeir hefðu átt að gera var að hækka skuldaþakið tímanlega, þannig að komist hefði verið hjá þessari umræðu til að byrja með,“ sagði Chambers í samtali við CNN.