Flugmóðurskipið Varyag við bryggju. Reuters

Kínverjar hafa að undanförnu unnið hörðum höndum að uppbyggingu hersins þar í landi en kínverski herinn er um þessar mundir langstærsti her heims. Í dag hélt fyrsta kínverska flugmóðurskipið úr höfn á leið til æfingar.

Varnarmálaráðherra Kína segir að um sé að ræða reglubundnar æfingar og mun flugmóðurskipið að hans sögn snúa fljótlega til hafnar aftur. Segja Kínverjar skipið einkum ætlað til rannsóknarverkefna og heræfinga.

Flugmóðurskipið er 300 metra langt og var keypt vélarvana og hálfklárað árið 1998. Talið er að skipið hafi upprunalega verið smíðað í Úkraínu fyrir sjóher Sovétríkjanna og bar það nafnið Varyag á þeim tíma. Smíði skipsins var aldrei kláruð sökum falls Sovétríkjanna árið 1991.

Hernaðarsérfræðingar hafa bent á að Kínverjar séu að öllum líkindum að prófa vélar og tækjabúnað skipsins. Að sögn er skipið enn hálfklárað og t.a.m. vanbúið þeim tækjum sem nauðsynleg eru til að lenda flugvélum á skipinu. Hafa þeir bent á að samkvæmt myndum sem birst hafa af flugmóðurskipinu virðist einungis vera hægt að lenda þyrlum á því. 

Búast má við áframhaldandi prófunum og æfingum næstu árin.