Strætó er byrjaður að ganga um Tottenham High Road á ný Reuters

Í frétt Sky sjónvarpsstöðvarinnar kemur fram að um táknrænan atburð hafi verið að ræða - íbúarnir vilja sýna heiminum að lífið gangi sinn vanagang á ný í hverfinu þeirra. 

Ótrúleg samstaða

Þingmaður hverfisins, David Lammy segir ótrúlegt að fylgjast með samstöðu íbúanna í þessu hverfi sem hafi upp á svo margt að bjóða. „Ég ólst upp á þessum stað. Ég ólst upp án föður og í fátækt. Móðir mín sagði mér að þú gætir verið fátækur en átt þitt stolt þrátt fyrir það."

Hann segir að það sé einungis lítið hlutfall íbúanna sem tók þátt í óeirðunum og þá, ásamt utanaðkomandi einstaklinga, skorti það stolt sem einkenni íbúa hverfisins.

Þrátt fyrir að búið sé að opna fyrir umferð um High Road, þar sem óeirðarseggir köstuðu bensínsprengjum og kveiktu í bifreiðum, eru enn margar verslanir lokaðar.

Einn skartgripasali og veðlánari sem Sky sjónvarpsstöðin ræddi við er óviss um framtíðina eftir að kveikt var í verslun hans og hún rænd. Hann hafi orðið fyrir því að vera rændur í 25 skipti um ævina. Hann hafi verið stunginn og hótað með byssu. Hann hafi lifað af og haldið áfram. Nú vilji hann endurtaka leikinn og rísa upp úr öskustónni á ný.

Fjölmargir hafa sýnt þeim sem urðu fyrir eignatjóni samstöðu og eru það einkum þeir sem reka lítil fyrirtæki sem hafa fengið stuðning frá almenningi. Meðal annars ætlar rakarinn Aaron Biber, 89 ára, að opna rakarastofu sína á ný eftir að hafa fengið 25 þúsund punda styrk frá almenningi.

Brotist var inn á rakarastofu hans,rúður brotnar og öllu steini léttara stolið, jafnvel hraðsuðukatlinum. Hann hefur sterka skoðun á því hvernig eigi að refsa óeirðaseggjunum: „Þetta er lýður. Ef ég næði í þá myndi ég skera þá á háls," segir Biber og bætir við „og ég meina það."

Hreinsað til í Tottenham Reuters