Forsætisráðherra Bretlands, David Cameron, segir að  óeirðarseggjum verði ekki sýnd nein miskunn en hann telur að óeirðirnar eigi eftir að setja mark sitt á sögu Bretlands.

Tveir menn sem grunaðir eru um að bera ábyrgð á dauð þriggja í óeirðunum verða leiddir fyrir dómara síðar í dag.

Hann segir að þeim sem brutu af sér verði ekki sýnd nein miskunn og að einhverjir gæfu alls konar skýringar á því sem gerðist. Það sem hafi gerst sé einfaldlega glæpsamlegt. Einungis fámennur hópur sé reiðubúinn til þess að brjóta af sér með þessum hætti en það séu um 100 þúsund fjölskyldur í Bretlandi sem standi afar illa fjárhagslega og félagslega. Þessar fjölskyldur kosti þjóðfélagið hundruð milljóna punda. Þessar fjölskyldur þurfi á hjálp að halda og það verði reynt að gera, segir Cameron í viðtali við Sunday Telegraph í dag.

Alls hafa 2.140 verið handteknir vegna óeirðanna og þar af hafa um eitt þúsund verið ákærðir. Tim Godwin, yfirmaður hjá Lundúnalögreglunni, segist gera ráð fyrir að þrjú þúsund manns verði ákærðir vegna óeirðanna áður en yfir lýkur. Hann segir að umfang ofbeldisins og glæpanna sem framdir voru sé mun meira en nokkurn hefði grunað. 

Í viðtali við Sunday Times í dag segir hann að á morgun, mánudag, verði tekin ákvörðun um hvort áfram verði aukalið lögreglu á götum úti á kvöldin og næturlagi. Í síðustu viku var lögreglu á vakt í höfuðborginni fjölgað úr 6 þúsund í 16 þúsund vegna óeirðanna.  

Cameron hefur ráðið bandaríska „ofurlöggu", Bill Bratton, sem meðal annars hefur verið lögreglustjóri í Los Angeles og New York, til þess að aðstoða bresk stjórnvöld í að taka á glæpahópum.

Breska lögreglan er ekki sátt við þessa ákvörðun forsætisráðherrans og telur að lögreglan heima fyrir sé best til þess fallin að taka á málunum.

„Ég er ekki viss um að ég vilji læra um glæpahópa á svæði í Bandaríkjunum þar sem 400 slíkir eru starfandi. Ég tel að ef þú ert með 400 slíka hópa þá er ljóst að þú hafir ekki verið mjög skilvirkur," segir Hugh Orde, formaður lögreglustjóra í Bretlandi í samtali við Independent í dag.