Tony Blair Reuters

Tony Blair, fyrrverandi forsætisráðherra Bretlands, sagðist í dag vera ósammála fullyrðingum núverandi forsætisráðherra um að siðferðisleg hnignun væri helsta orsök óeirðanna í landinu fyrir tveimur vikum.

Blair varar við slíkum útskýringum og segir þær geta leitt til rangrar ákvarðanatöku. „Bretland er ekki í neinni siðferðislegri klemmu,“ segir Blair í grein sem hann skrifaði í dagblaðið Observer.

„Aðalástæðan er að hér er stór hópur ungs fólks, sem stendur fyrir utan samfélagið. Þau lifa og hrærast í samfélagi þar sem aðrar hegðunarreglur eru í gildi, “ skrifar Blair.

Misjafnar skýringar hafa verið gefnar á skemmdarverkunum og óeirðunum. Vinstriflokkar segja að ástæðan sé fyrst og fremst fátækt og almennur skortur þeirra sem tóku þátt í þeim, en hægrimenn segja að skorti á ábyrgð sé helst um að kenna.

Í dagblaðinu Sunday Express skrifar David Cameron forsætisráðherra að sjálfselska og sú trú að einstaklingsréttindi séu æðri en allt annað sé stór hluti ástæðunnar fyrir óeirðunum.

Blair segir aftur á móti að þeir sem tóku þátt í óeirðunum séu ekki dæmigerðir fyrir breskt samfélag.

Breskir dómstólar hafa verið gagnrýndir fyrir að hafa tekið of hart á sökudólgunum. Fjögurra ára fangelsisdómur yfir tveimur ungum mönnum, sem hvöttu til óeirða á Facebook, hefur til dæmis verið mikið gagnrýndur.

En Cameron hefur gefið út yfirlýsingar þess efnis að óeirðaseggir verði ekki teknir neinum vettlingatökum og margt bendir til þess að breskur almenningur styðji það. Til dæmis sýnir skoðanakönnun að 68% almennings í Bretlandi styðja að óeirðaseggir verði teknir af framfæri hins opinbera.

Alls hafa 1.875 verið handteknir vegna óeirðanna og 1.073 hafa verið kærðir í London.

Hundruð manna hafa verið handtekin og sætt ákærum í Manchester og Birmingham.