Leiðtogi þjóðarráðs uppreisnarmanna í Líbíu sagði í viðtali við ítalska blaðið La Repubblica í morgun, að  kosningar verði haldnar í landinu eftir átta mánuði og að réttað verði yfir Múammar Gaddafi í Líbíu.

„Við munum halda  þing- og forsetakosningar eftir átta mánuði. Við viljum lýðræðislega ríkisstjórn og réttláta stjórnarskrá," sagði Abdel Jalil, forseti þjóðarráðsins, í viðtalinu.

Hann sagði, að umfram allt vildu Líbíumenn brjótast út úr þeirri einangrun, sem þeir hefðu verið í undanfarna áratugi.

Skrifstofa Nicolas Sarkozy, Frakklandsforseta, tilkynnti í morgun að forsetinn muni síðdegis í dag eiga fund með  Mahmud Jibril, forsætisráðherra þjóðarráðsins, í París. Þar verði rætt um stöðu mála í Líbíu og hvernig alþjóðasamfélagsið geti stutt uppbygguna, sem framundan er í landinu.

Uppreisnarmenn náðu í gær höfuðstöðvum Gaddafis í Tripoli á sitt vald. Gaddafi var hins vegar ekki þar og í nótt var vitnað í ávarp, sem hann var sagður hafa flutt í útvarpi, þar sem hann sagðist aldrei myndu gefast upp og hvatti Líbíumenn til að fara til höfuðborgarinnar og reka uppreisnarmenn þaðan burt.

Guma Al-Gamaty, Breti sem hefur unnið hefur með þjóðarráðinu, sagði við breska ríkisútvarpið í morgun, að verið væri að byrja að flytja höfuðstöðvar þjóðarráðsins frá Benghazi í austurhluta landsins, til Tripoli. Vonir stæðu til að þeim flutningum yrði lokið á laugardag.

Jalil sagði, að valdatími Gaddafis væri í raun á enda þótt honum lyki ekki formlega fyrr en Gaddafi yrði handsamaður og hann þyrfti að svara til saka fyrir glæpi sína.  

Hann sagði, að herflokkar hliðhollir Gaddafi héldu enn uppi vörnum á nokkrum stöðum í höfuðborginni og í Sirte, heimabæ Gaddafis. Hins vegar réðu uppreisnarmenn nú yfir nánast öllu landinu.

Hann sagði að það væri almenn skoðun innan þjóðarráðsins, að handtaka eigi Gaddafi og samstarfsmenn hans og rétta yfir þeim í Líbíu.   

Þá sagði Jalil, að hin nýja Líbía yrði að vera öðruvísi land en það hefur verið áður og stjórnarfarið eigi að byggjast á frelsi, jafnrétti og bræðralagi. Þá vilji landið eiga góð samskipti við önnur lönd.  

„Við munum taka virkan þátt í starfi alþjóðasamfélagsins og virða þá samninga, sem gerðir hafa verið í fortíðinni,“ sagði hann.