THIERRY ROGE

Stjórnendur Facebook, Twitter og BlackBerry eru boðaðir á fund hjá innanríkisráðherra Bretlands til að ræða óeirðirnar í Bretlandi, þar sem talið er að óprúttnir notendur ofangreindra samskiptasíðna hafi átt þátt í að kynda undir óeirðunum í Bretlandi. Þetta kemur fram á fréttavef Sky News.

Theresa May, innanríkisráðherra Bretlands, hefur sent frá sér tilkynningu þar sem hún segist hafa boðað til fundar eftir að hugmyndir komu upp  um að loka samskiptasíðum á borð við Facebook, ef sambærilegur órói kemur upp aftur.

Á fundinum verður rætt hvort lokað verði á þá notendur sem efna til slíkra vandræða.

Þjónusta eins og BlackBerry Messenger, sem gerir notendum kleift að senda ókeypis skilaboð í rauntíma, er sögð hafa kynt undir óeirðarseggjum í skipulagningu á óeirðunum. 

Fulltrúi frá innanríkisráðuneytinu sagði í samtali við fréttavef Sky News að það væru engar fyrirætlanir um að loka samskiptasíðum. Hún sagði að fundurinn yrði skipaður fulltrúum frá samskiptasíðunum, lögreglunni og yfirmönnum lögreglunnar og þar yrði meðal annars rætt hvernig þessir aðilar gætu unnið saman og reynt að  koma í veg fyrir skipulögð ofbeldisverk í gegnum samskiptasíður.

Ennfremur sagði hún að samskiptasíður hafi ekki verið orsök mótmælanna heldur vettvangur fyrir glæpamenn að hafa samskipti sín á milli.

Talsmaður frá fyrirtækinu Facebook sagði að fyrirtækið væri nú þegar farið að skoða þá hluti sem gætu hafa haft áhrif. Hún sagði tilhlökkunarefni að útskýra fyrir innanríkisráðuneytinu þá mælikvarða sem þeir nota til að sýna fram á að Facebook sé öruggur og jákvæður samskiptamiðill á tímum sem þessum. 

Máli sínu til stuðnings sagði hún fyrirtækið hafa bent á stuðningssíðu á Facebook, sem fengið hefur eina milljón stuðningsmenn, sem ber titilinn „Supporting The Met Police Against The London Rioters“ eða síða þar sem fólk veitir lögreglunni í Lundúnum stuðning til að berjast gegn óeirðunum.