Hræ ísbjarnarins, sem réðist á Bretana. Reuters

Sextán ára drengur, sem slasaðist alvarlega þegar ísbjörn réðist á hann og félaga hans á Svalbarða nýlega, lýsti reynslu sinni í blaðaviðtali í dag. 17 ára félagi drengsins lét lífið og þrír aðrir særðust alvarlega.

Patrick Flinders var í leiðangri á Svalbarða ásamt 11 öðrum ungum Bretum og einum breskum leiðangursstjóra. Aðfaranótt 5. ágúst réðst björninn á bækistöðvar Bretanna. Vísindamenn telja, að björninn hafi þjáðst af tannpínu og það gæti verið ástæðan fyrir árásinni. 

Finders, sem er frá Jersey, svaf við hliðina á Horatio Chapple, 17 ára, þegar björninn gerði árás.

„Ég leit upp og sá þegar þessi risastóri kjaftur lokaðist. Hann var alblóðugur á trýninu. Ég hélt að ég myndi deyja," segir Flinders í viðtali við Sunday Mirror í dag.

„Hann sló mig með hramminum og handleggurinn á mér fór upp úr svefnpokanum. Síðan fann ég þegar hann beit mig í olnbogann inn að beini. Skyndilega var höfuðið á mér í bjarnarkjaftinum og ég fann þegar hann bruddi á mér hauskúpuna. Ég heyrði hana bresta og ég heyrði björninn urra í eyrað á mér. Ég reyndi að slá björninn í höfuðið með hendinni, aftur og aftur." 

Chapple lét lífið en hann var jarðsettur í gær. Tveir aðrir leiðangursmenn, þar á meðal leiðangursstjórinn, særðust en honum tókst að skjóta björninn og drepa hann.

Flinders slasaðist alvarlega á höfði og þurfti að gangast undir aðgerð til að fjarlægja brot úr bjarndýrstönnunum. Hann er með stórt sár á enninu, eyra og kinnum og annað augað er skakkt. Hann þarf að gangast undir fleiri aðgerðir til að lagfæra augað.

Flinders sagði, að það væri tilviljun að Chapple lét lífið. „Ef ég hefði sofið þar sem hann svaf væri ég dáinn. Ég er með samviskubit yfir því að það var hann en ekki ég."

Vefur Sunday Mirror

Vefur Sunday Mirror.