Ríkisstjóri Texas og forsetaframbjóðandinn Rick Perry vill að lögin fái að halda sér. Reuter

Dómari í Texas í Bandaríkjunum hefur úrskurðað að nokkur lykilákvæði nýrrar lagasetningar um fóstureyðingar í ríkinu séu ekki í samræmi við önnur lög en nýju lögin taka gildi á morgun.

Dómarinn Sam Sparks sagði að umdeilt ákvæði, sem skyldar lækna til þess að lýsa fóstrinu fyrir konum í ómskoðun áður en þær gangast undir fóstureyðingu, bryti í bága við málfrelsi bæði læknis og sjúklings.

Sparks sagði að það að skylda lækna til þess að ræða niðurstöður ómskoðunar við sjúklinga, sem ef til vill vildu ekkert um þær heyra, „þvingaði lækna til þess að halda uppi hugmyndafræði sem þeir hugsanlega aðhylltust ekki, án tillits til þess hvort nauðsyn bæri til né þess hvort þungaða konan vildi heyra eða ekki“.

Dómarinn sagði einnig í úrskurði sínum að hann hefði miklar áhyggjur af því, að til þess að komast hjá því að þurfa að hlusta á lækni lýsa fóstrinu fyrir fóstureyðingu þyrftu fórnarlömb nauðgana og/eða sifjaspella að skrifa undir yfirlýsingu því til staðfestingar og þar með upplýsa um afar persónuleg mál sín sem væru síðan til í gagnasöfnum sem væru í besta falli hálfpersónuvernduð.

Yfirvöld hafa þegar ákveðið að áfrýja úrskurði dómarans en stuðningsmenn laganna segja þessi ákvæði nauðsynleg til þess að tryggja að konur öðlist skilning á því hvað felist í því að fara í fóstureyðingu.

Ríkisstjóri Texas og forsetaframbjóðandinn Rick Perry er meðal þeirra sem hafa harðlega gagnrýnt úrskurð Sparks. „Hvert líf sem tapast í fóstureyðingu er harmleikur og þessi úrskurður er mikil vonbrigði fyrir alla íbúa Texas sem vilja standa vörð um lífið,“ sagði hann meðal annars.

Nánar má lesa um málið á vef Huffington Post.