Sergelstorg í Stokkhólmi.

Ítalskur faðir var í héraðsdómi í Svíþjóð í dag dæmdur til þess að greiða 6.600 sænskar krónur, 116 þúsund íslenskar krónur, í sekt fyrir að hafa rifið í hár tólf ára gamals sonar síns á veitingastað í Stokkhólmi.

Frá árinu 1979 hefur verið bannað með lögum í Svíþjóð að beita börn líkamsrefsingum og skipti engu að ítalska fjölskyldan var í leyfi í Svíþjóð en ekki íbúar í landinu. Faðirinn ítalski, Giovanni Colasante, sem er 45 ára, er stjórnmálamaður frá Suður-Ítalíu.

Colasante-fjölskyldan var í gamla hluta Stokkhólms í síðasta mánuði og ákvað að fá sér að borða á veitingastað þar. Sonurinn heimtaði að fá pizzu í matinn og stakk af þegar hann fékk ekki vilja sínum framgengt. Faðirinn elti stráksa uppi og þreif í háls hans og hár. Vegfarandi sem varð vitni að atburðinum hringdi á lögreglu sem handtók Colasante fyrir ofbeldið. Þrátt fyrir að hafa neitað því að hafa beitt piltinn ofbeldi heldur hafi hann verið að koma í veg fyrir að strákurinn stingi af var hann dæmdur til þess að greiða sekt fyrir athæfið.