Rice og Palin.

Stjórnmálaferill Söru Palin, varaforsetaefnis repúblikana í forsetakosningunum 2008, gæti verið í uppnámi reynist upplýsingar í nýrri bók um ævi hennar réttar. Er þar því haldið fram að Palin hafi haldið framhjá þáverandi sambýlismanni sínum, Todd, með körfuboltastjörnu. Todd segir þetta „ógeðslegar lygar“.

Todd fer hörðum orðum um bók metsöluhöfundarins Joe McGinniss, The Rogue: Searching for The Real Sarah Palin, sem kemur út í næstu viku en það er bandaríska götublaðið National Enquirer sem hefur birt kafla úr bókinni.

Todd beinir orðum sínum til McGinniss.

„Þessi maður hefur stöðugt setið um fjölskyldu mína og upp að því að marki að flytja inn í húsið við hliðina á okkur til að áreita okkur og njósna um okkur og þannig svala sinni ógeðfelldu þráhyggju um konu mína. Bók hans er sneisafull af ógeðslegum lygum, aðdróttunum og rógburði. Jafnvel The New York Times kallaði bókina „úrelta, aumkunarverða“ og sagði höfund hennar eltast við bituryrði og slúður,“ sagði Todd í yfirlýsingu sem m.a. var birt á vef ABC News.

Höfundurinn leigði hús í Wasilla

En fram kemur í bandarískum fjölmiðlum að McGinniss hafi lagt sig í lima við að grafa upp óhreinindi um Palin og í því skyni leigt hús við hliðina á heimili Palin-hjónanna í Wasilla í Alaska.

Eins og fram kom á fréttavef Morgunblaðsins í gær mun næturgamanið hafa átt sér stað um Þakkargjörðarhátíðina 1987 og næturstaðurinn verið herbergi systur Palin á heimavistinni á Háskólanum í Alaska í Anchorage.

Palin mun einnig hafa haldið framhjá Todd með viðskiptafélaga hans eftir að þau festu ráð sitt og áttu barn saman á tíunda áratugnum. Þá er því haldið fram að Palin hafi reykt hass með háskólaprófessor og prófað kókaín í skemmtiferð.

McGinniss er einnig höfundur bókanna Fatal Vision og The Selling of the President.