Efnahagserfiðleikar og breiðfylking ólíkra stjórnmálaflokka sem þurfa að vinna saman í ríkisstjórn er verkefnið sem bíður Helle Thorning-Schmidt, leiðtoga danskra Jafnaðarmanna. Þetta eru svipaðar aðstæður og Paul Nyrup, fyrirrennari hennar í starfi stóð frammi fyrir árið 1993.

Þetta segir í fréttaskýringu í danska dagblaðinu Børsen í dag.

„Það verður ekki auðvelt fyrir Helle Thorning-Schmidt að fá endana til að ná saman í efnahagsmálum,“ segir stjórnmálaskýrandinn Peter Goll.

Hann bendir á að væntanlegir samstarfsflokkar Thorning-Schmidt séu með ólík stefnumál, til dæmis hafi Enhedlisten margoft gagnrýnt það sem þau kalla „borgaralegar áherslur“ Radikale Venstre í efnahagsmálum.

Goll segir að það verði krefjandi verkefni fyrir flokkana að stilla saman strengi sína í efnahagsmálum.

Hann segir að það verði heldur ekki létt verk að fá stuðning annarra flokka við ýmis mikilvæg mál sem þurfi að leysa. „Þetta verður ekki auðvelt verkefni, en Poul Nyrup Rasmussen tókst þetta á tíunda áratugnum, svo að auðvitað er þetta mögulegt,“ segir Peter Goll.

Hann heldur því fram að þær aðstæður sem Thorning-Schmidt stendur nú frammi fyrir séu svipaðar þeim sem Anders Fogh Rasmussen stóð frammi fyrir þegar hann myndaði ríkisstjórn Venstre og Íhaldsmanna með stuðningi Danska þjóðarflokksins.

„Þá hélt fólk að ríkisstjórnarsamstarfið myndi endast í viku, því að stjórnarandstaðan taldi að Þjóðarflokkurinn gæti ekki komið fram með raunhæfar efnahagstillögur. En annað kom á daginn,“ segir Goll.

Hann metur stöðuna á þann veg að fyrstu stóru málin sem Thorning-Schmidt muni vinna í séu breytingar á eftirlaunakerfinu í landinu.