Helle Thorning-Schmidt, verðandi forsætisráðherra Danmerkur, segist ekkert geta gefið upp um hversu langan tíma stjórnarmyndunarviðræður gætu tekið. „Þær hafa yfirleitt tekið rúman tíma og við tökum okkur þann tíma sem við þurfum,“ sagði Helle í samtali við dönsku sjónvarpsstöðina TV2 í morgun.

Komast þarf að samkomulagi fjögurra flokka, sem eru með ólík stefnumál á ýmsum sviðum; en auk Jafnaðarmanna er talið líklegt að Sósíalíski þjóðarflokkurinn, Radikale Venstre og Enhedslisten muni hafa aðkomu að nýrri ríkisstjórn.

En Helle er hvergi bangin. „Það hefur alltaf verið krefjandi verkefni að komast að samkomulagi um að mynda ríkisstjórn. Þannig hefur það alltaf verið og þannig verður það líka núna,“ segir hún.

Úrslit gærdagsins urðu sumum flokkunum gríðarleg vonbrigði en aðrir fögnuðu mikilli fylgisaukningu. Þannig mæta þingmenn Radikale inn í stjórnarsamstarfið full sjálfstrausts eftir góðan árangur, en flokkurinn bætti við sig átta þingmönnum.

Sósíalíski þjóðarflokkurinn á aftur á móti undir högg að sækja, en hann tapaði sjö þingmönnum í kosningunum.

„Það er bæði gott og mikilvægt að Radikale hafi náð svona góðum árangri. Þau koma inn með mikið sjálfstraust, en því fylgir líka mikil ábyrgð, rétt eins og Súpermann sagði,“ segir Helle og efast ekki um að Sósíalíski þjóðarflokkurinn muni hjarna við

Helle segir að þó komandi ríkisstjórn verði að öllum líkindum vinstristjórn, þá sé hún líka opin fyrir öllum hugmyndum.