Gömul orrustuflugvél hrapaði nálægt áhorfendastúkunni á Reno flugkeppninni í Nevada. Nokkrir áhorfendur fórust og að minnsta kosti 54 slösuðust.

Staðfest er að að minnsta kosti tveir hafi farist í slysinu, annar þeirra var aldraður flugmaður orrustuflugvélarinnar. Meira en 50 slösuðust, þar af voru 15 sagðir vera alvarlega slasaðir.

Flugmaðurinn hét Jimmy Leeward og var 74 ára. Hann flaug P-51 Mustang orrustuflugvél sem kölluð var „Galloping Ghost“ (Stökkvandi vofa). Hún hrapaði við áhorfendastúku flugkeppninnar.

„Hann kom í áttina að áhorfendastúkunni og skyndilega heyrði ég smell, smá smell og flugvélin fór bara beint upp. Það var smá flökt og hún fór beint upp og eins og valt aðeins. Svo stakkst hún á nefið og fór beint niður,“ sagði einn áhorfenda.

Slysið er nú metið sem fjöldaslys. Stjórnandi Reno flugkeppninnar gat ekki staðfest fjölda látinna. „Ég get sagt að það slösuðust alls 54 og þeir hafa allir verið fluttir. Spítalarnir gefa nánari upplýsingar þegar þeir geta. En tölurnar, þetta eru bara þeir sem eru slasaðir og voru fluttir. Við erum ekki með endanlega tölu um fjölda látinna,“ sagði Mike Houghton, framkvæmdastjóri The Reno Air Racing Association.

Reno flugkeppnin fer fram við flugvöll norðan við borgina. Slysið þar var það nýjasta í röð banaslysa sem orðið hafa á flugsýningum í Bandaríkjunum síðan í ágúst s.l.