Konur verða nú í fyrsta sinn meðal hermanna í framvarðasveitum ástralska hersins en á næstu fimm árum verða smám saman lögð niður boð og bönn sem hingað til hafa meinað konum að sinna þeim störfum innan hersins sem talin hafa verið of hættuleg fyrir þær.

Á þetta við um allt að 17% starfa innan hersins og munu konur nú m.a. geta sótt um að verða sprengjukafarar, leyniskyttur og varnaliðar í flughernum. Munu umsækjendur í þessi störf nú loks verða metnir eftir líkamlegu, sálrænu og andlegu atgervi en ekki kyni.

„Þetta er stórvægileg breyting og menningarleg,“ sagði varnarmálaráðherra Ástralíu, Stephen Smith. „Þetta snýst einfaldlega um að manna sóknarlínuna með hæfasta fólkinu, óháð kyni. Í framtíðinni verður hlutverk fólks ákvarðað á grundvelli getu, ekki kyns,“ sagði hann.

Í flestum löndum heims er konum leyft að þjóna í hernum en aðeins nokkur þeirra leyfa konur í framvarðasveitum. Þeirra á meðal eru Kanada, Nýja-Sjáland, Danmörk, Finnland, Frakkland, Ítalía, Þýskaland og nú Ástralía.

Af 60 þúsund hermönnum ástralska hersins eru aðeins átta þúsund konur en vonir standa til að þeim muni fjölga þegar átakinu verður hrint í framkvæmd í mars næstkomandi.