Buckinghamhöll. mbl.is/Brynjar Gauti

Lík bandarísks manns, sem var heltekinn af bresku konungsfjölskyldunni og sendi Elísabetu Englandsdrottningu hundruð bréfa, fannst fyrr á þessu ári á eyju við Buckinghamhöll í Lundúnum. Talið er að líkið hafi legið þarna í um þrjú ár.

Breskir fjölmiðlar segja, að líkið hafi fundist í mars á eyju í St. James Park um 100 metra frá konungshöllinni. Nú hefur verið staðfest, að um er að ræða líkamsleifar Roberts James Moores. 

Málið varð opinbert í réttarrannsókn í síðustu viku. Moore var hátt á sjötugsaldri þegar hann lést en hann er sagður hafa sent Englandsdrottningu hundruð „einkennilegra og óþægilegra" sendinga á um 15 ára tímabili. Sum bréfin voru allt að 600 síðna löng. 

Moore kom til Bretlands frá Bandaríkjunum árið 2007. Bandaríska sendiráðið segir að vitað sé að hann hafi komið með leigubíl til sendiráðsins við  Grosvenortorg þar sem hann bað um aðstoð við að greiða sekt. Síðan hefur ekkert spurst til hans.

15. mars fann garðyrkjumaður líkamsleifar á eyju í St. James Park. Við hlið líksins voru nokkrar vodkaflöskur og gulur púði. Eina leiðin yfir á eyjuna er að vaða yfir grunnt vatn eða róa þangað á báti en eyjan er um 100 metra frá aðalinngangi Buckinghamhallar. 

Bandarískt vegabréf og fannst í fötum Moores og því var hægt að bera á hann kennsl. Hann virðist ekki eiga neina ættingja og var ekki eftirlýstur.