Ánægja með val nóbelsnefndar
Kanslari Þýskalands, Angela Merkel og utanríkisráðherra Bandaríkjanna, Hillary Clinton, eru meðal þeirra fjölmörgu sem hafa fagnað vali nóbelsverðlaunanefndarinnar í dag. Í morgun var greint frá því að þrjár konur myndu deila friðarverðlaununum í ár.
Ellen Johnson Sirleaf, forseti Líberíu, Leymah Gbowee frá Líberíu og Tawakul Karman frá Jemen.
Ellen Johnson Sirleaf, forseti Líberíu, Leymah Gbowee frá Líberíu og Tawakul Karman frá Jemen.
Thorbjørn Jagland, formaður verðlaunanefndar norska Stórþingsins, tilkynnti um verðlaunin í norska þinghúsinu klukkan 9. Sagði hann að konurnar þrjár fengju verðlaunin fyrir friðsamlega baráttu þeirra fyrir bættu öryggi kvenna og fyrir rétti kvenna til að taka fullan þátt í uppbyggingarstarfi til að tryggja frið.
„Við getum ekki náð fram lýðræði og varanlegum friði í heiminum nema konur fái sömu tækifæri og karlar til að hafa áhrif á þróun mála á öllum sviðum samfélagsins,“ sagði Jagland.
Merkel, sem nýverið var tilnefnd sem áhrifamesta kona heims í fjórða skiptið af Forbes-tímaritinu lýsti vali nefndarinnar sem góðri vísbendingu sem vonandi mundi hvetja margar konur og karlmenn í heiminum til dáða í baráttunni fyrir frelsi og lýðræði og gegn óréttlæti. Nefndi hún Karman sérstaklega í því sambandi en hún er fyrsta arabíska konan til þess að hljóta nóbelsverðlaun. Segir Merkel Karman búa við þær aðstæður að vera ekki frjáls og því vilji hún sérstaklega hrósa henni sérstaklega, sagði Merkel í dag.
Karman, er 32 ára gamall blaðamaður og aðgerðarsinni í Jemen og þriggja barna móðir. Hún hefur verið dæmd í fangelsi í nokkur skipti fyrir baráttu sína fyrir réttindum kvenna í heimalandinu, frelsi fjölmiðla og eins hefur hún barist fyrir lausn pólitískra fanga í Jemen.
Clinton hrósaði nóbelsnefndinni fyrir valið í ár og segir að það veiti réttindabaráttu kvenna innblástur sem og almennri mannréttindabaráttu í heiminum. Clinton hefur lengi barist fyrir réttindum kvenna og lýsti Gbowee og Karman sem lifandi dæmum um hvaða árangri konur geti náð við að hjálpa öðrum.
Ellen Johnson Sirleaf, sem er 72 ára, er fyrsta konan, sem kosin hefur verið forseti í Afríkuríki. Hún tók við embættinu árið 2006. Nóbelsnefndin segir í yfirlýsingu, að frá þeim tíma hafi Sirleaf lagt mikið af mörkum til að tryggja frið í Líberíu með því að beita sér fyrir efnahagslegum og félagslegum umbótum og styrkja stöðu kvenna.
Leymah Gbowee, sem er 39 ára og sex barna móðir, skipulagði samtök kvenna í Líberíu þvert á ættflokka og trúarbrögð og stuðlaði þannig að því að binda enda á langvinnt borgarastríð í landinu og tryggja þátttöku kvenna í kosningum þar. Nóbelsnefndin segir að hún hafi síðan unnið að því að auka áhrif kvenna í Vestur-Afríku eftir stríðið.
