Mervyn King (t.v.), bankastjóri Englandsbanka, er hér á tali við Timothy Geithner (t.v.) fjármálaráðherra Bandaríkjanna á G20 fundinum í París í dag. Reuters

Tim Geithner, fjármálaráðherra Bandaríkjanna, sagði í dag að sundurliðuð áætlun sem kynnt var á G20 ráðstefnunni í dag um aðgerðir til að takast á við skuldavanda evrusvæðisins innihaldi „réttu þættina“.

„Við heyrðum uppörvandi hluti frá evrópskum kollegum okkar í París um nýja heildstæða áætlun til að takast á við kreppuna á meginlandinu,“ sagði Geithner í yfirlýsingu sem hann gaf út eftir fund fjármálaráðherra G20 ríkjanna í París.

„Liðir þessarar áætlunar innihalda miklu veglegri efnahagslega eldveggi til að tryggja það að ríkisstjórnir Evrópu geti tekið lán með sjálfbærum vöxtum um leið og þeir gera umbætur, grípa til víðtækrar endurfjármögnunar banka, frekari stuðningur við sjálfbæra áætlun fyrir Grikkland og skref í átt til efnahagsbandalags,“ sagði hann og bætti við að áætlunin innihéldi „réttu þættina“.

Geithner hélt því einnig fram að Alþjóðagjaldeyrissjóðurinn hefði úr nógu að spila til þess að takast á við skuldakreppuna, þrátt fyrir óskir sumra félaga G20 um stækkun sjóðsins. Hann sagði sjóðinn ráða yfir verulegum efnahagslegum björgum.

Þá hvatti bandaríski fjármálaráðherrann þróunarríki til að vinna að því að efla eftirspurn heimafyrir til að byggja upp efnahag heimsins og að Kínverjar dragi úr stýringu á gjaldmiðli sínum, yuan.