Mótmælt við kauphöllina í Toronto

Um þrjú hundruð tóku þátt í mótmælum í miðborg Toronto í Kanada í kvöld. Fór hópurinn meðal annars að kauphöll borgarinnar. Í borginni Montreal tóku nokkur hundruð þátt í mótmælum í garði í miðborginni.

Mótmælin í Kanada eru líkt og mótmæli víða um heim þessa dagana sprottin upp úr mótmælum á Wall Street, fjármálahverfi New York-borgar, en almennir borgarar virðast vera búnir að fá sig fullsadda á því valdi sem fjármálaheimurinn hefur yfir stjórnmálamönnum og stöðu efnahagsmála.

Meðal þeirra sem tóku til máls á fundi mótmælenda í Toronto er Brigette DePape, sem vakti mikla athygli í Kanada í júní sl. þegar hún truflaði fund öldungadeildar Kanadaþings með því að halda uppi skilti sem stóð á: Stöðvum Harper, og vísaði þar til Stephens Harpers forsætisráðherra.

Sagði hún í kvöld að þegar fólk kæmi saman á götum úti til þess að láta til sín taka yrði til samtakamáttur sem vildi breytingar. Mótmælendurnir ætla ekki að láta staðar numið og segjast ætla að mótmæla fram á vetur. 

Joe Scalia, 24 ára, frá Windsor í Ontario hefur eytt tveimur síðustu nóttum í Saint James-garðinum ásamt fleiri mótmælendum. Hann sagðist vera með tvöfalda háskólagráðu og hefði unnið fyrir hið opinbera. Hann væri með góða ferilskrá en það breytti engu, hann fengi enga vinnu.

• 1 blogg um fréttina

Bloggað um fréttina

• Steinar Þorsteinsson: Friðsemd fjöldans!