Stefan Ramin og Heike Dorsch.

Fertugur þýskur ferðamaður, sem var á ferð á eyjunni Nuku Hiva í Frönsku Pólýnesíu, er horfinn. Óttast er að hann hafi lent í klóm mannætna en lögregla hefur fundið brunnar líkamsleifar nálægt kulnuðu báli.

Stefan Ramin var í fríi í Karíbahafi ásamt Heike Dorsch, unnustu sinni. Hann fór ásamt leiðsögumanni, sem nefnist Henri Haiti, á geitaveiðar á eyjunni fyrir mánuði og síðan hefur ekkert til hans spurst. 

Fram kemur á vef breska blaðsins Daily Telegraph, að Haiti snéri til baka og sagði unnustu Ramins að það hefði orðið slys og Ramin hefði slasast. En þegar Dorsch ætlaði að kalla lögreglu til réðst Haiti á hana, batt hana við tré og lagði síðan á flótta. Lögregla leitar hans nú.

Lögregla og hermenn hafa leitað á Nuku Hiva og fundið brunnar líkamsleifar og föt nálægt kulnuðu eldstæði í afskekktum dal. Líkamsleifarnar hafa nú verið sendar til Parísar þar sem rannsaka á hvort um sé að ræða lík Ramins. Talið er hugsanlegt, að mannætur á eyjunni hafi ráðist á Ramin, hlutað lík hans í sundur og lagt sér það til munns.

Þau Ramin og Dorsch lögðu af stað frá Þýskalandi á tvíbytnu árið 2008 í ævintýraferð. Þau komu til Nuku Hiva, sem er stærsta eyjan í Marquesas eyjaklasanum um miðjan september og ætluðu að dvelja í nokkra mánuði á Frönsku Pólýnesíu. 

Málið hefur vakið mikla athygli og umtal í Frönsku Pólýnesíu. Um 2000 manns búa á Nuku Hiva og þar var mannát stundað fyrr á árum en talið var að slíkt tíðkaðist ekki lengur.