Búrkuklædd kona heldur á barni með ennisband þar sem á stendur „sjaría". AP

Lítill hópur öfgafullra múslíma í Danmörku, s.k. salafistar, segist ætla að fylgja í fótspor breskra íslamista og innleiða sjaríalög í Danmörku. Hópurinn hefur boðað að eftirfylgni með sjaríalögum allan sólarhringinn í Tjingberg hverfinu í Kaupmannahöfn. Síðar muni löggæslan breiðast út um Nørrebrø og lokamarkmiðið sé að sjaríalög gildi í allri Danmörku.

Á þeim svæðum þar sem sjaríalög gilda verði afskipti höfð af fólk sem drekkur áfengi, spilar á spil, dansar á diskótekum og sýnir aðra viðlíka hegðun sem samkvæmt harðlínumönnum stríðir gegn íslam. Í London í sumar lýstu salafistar, undir stjórn klerksins Anjem Choudary, því yfir að sjaríalög hefðu tekið gildi á ákveðnum svæðum borgarinnar.

Samtök múslíma í Danmörku hafna þessum fyrirætlunum. „Við megum ekki vera blind gagnvart öfgahneigðum í samfélaginu," hefur Politiken eftir talsmanni samtakanna, Mustafa Gezen. „Vandamálið er að mörg ungmenni búa nú við slíkar aðstæður að þau eru móttækileg fyrir svona skoðunum. Við þurfum að bregðast við með því að leggja áherslu á mikilvægi lýðræðislegrar þátttöku í grunnskólunum."

Gezen segir að öfgamennirnir, s.k. salafistar, séu í miklum minnihluta í Danmörku. „Í samtökunum okkar eru 40.000 meðlimir sem styðja ekki þeirra sjónarmið."