Dominique Strauss-Kahn Reuters

Lögreglurannsókn á því hvort vændi hafi verið stundað á frönsku lúxus-hóteli hefur leitt í ljós að fyrrverandi framkvæmdastjóri Alþjóðagjaldeyrissjóðsins, Dominique Strauss-Kahn, mætti í kynlífsveislur með vændiskonu upp á arminn sem kaupsýslumenn greiddu fyrir. Þetta kemur fram í frönskum dagblöðum í dag.

Lögregla rannsakar nú einnig ferðir kaupsýslumanna og lögreglustjóra til Washington þegar Strauss-Kahn stýrði AGS, samkvæmt fréttum dagblaðanna Liberation og Le Figaro.

Síðasta ferðin af þessum toga var farin í maí og lauk henni þann 13. maí sl. degi áður en lögreglan í New York handtók Strauss-Kahn fyrir meinta nauðgunartilraun á hóteli þar í borg. Fallið var frá ákæru á hendur honum þar sem herbergisþernan, sem kærði hann fyrir tilraun til nauðgunar, hafði orðið uppvís að lygi þegar hún sótti um landsvistarleyfi í Bandaríkjunum. Því var efast um trúverðugleika hennar sem vitnis í kynferðisbrotamálinu.

Lögreglustjórinn í Lille yfirheyrður

Nýverið var einnig hætt við rannsókn máls um hvort Strauss-Kahn hefði reynt að nauðga ungri konu Tristane Banon í París árið 2003. Var rannsókninni hætt þar sem of langt er um liðið síðan meint ofbeldi átti sér stað.

Rannsóknin á vændishringnum hófst þegar framkvæmdastjóri og yfirmaður almannatengsla á Carlton hótelinu í Lille voru handteknir og ákærðir fyrir að útvega gestum á hótelinu vændiskonur og að hafa notið til þess aðstoðar melludólgs sem er staðsettur í Belgíu.

Lögreglustjórinn í Lille, Jean-Christophe Lagarde, sem var yfirheyrður af lögreglu í gær, vegna mögulegrar aðildar að vændishringnum, á að hafa mætt í veislur á lúxus hóteli í París með vændiskonum og félaga sínum, Strauss-Kahn.

Lét fyrirtækið borga fyrir svallveislurnar

Samkvæmt frétt Le Figaro á  David Roquet, yfirmaður dótturfélags verktakafyrirtækisins  Eiffage, að hafa greitt hluta reikningsins fyrir svallveislurnar á hótelinu í París og lagt fram reikninga fyrir útlögðum kostnaði til fyrirtækisins sem hann starfar hjá. Voru upphafsstafir Strauss-Kahn, DKS, ritaðir á reikningana.

Lögregla hefur einnig yfirheyrt kaupsýslumann frá Lille, sem er nefndur Fabrice P. í gögnum lögreglu, sem einnig er talinn hafa greitt hluta reikningsins.

Samkvæmt framburði Roquet hjá lögreglu, sem Le Figaro vísar í, á Fabrice P. að hafa sagt honum að þeir borða með Strauss-Kahn og hann vildi að Roquet tæki vinkonur með og átti þar við vændiskonur.

Fyrsta boðið af þessu tagi var haldið á L'Aventure staðnum í París í mars 2009. Þar höfðu karlkynsgestirnir mök við vændiskonurnar og fóru síðan á lúxus-hótelið Morano þar sem kynlífssvallið hélt áfram, að sögn Roquet.

Slík boð voru í tvígang haldin árið 2010.  Í vitnisburði Roquet kemur fram að þeir hafi borðað fyrst saman og síðan haft mök við vændiskonurnar en hver þeirra félaga hafði vændiskonu út af fyrir sig.  Nafngreinir hann Strauss-Kahn sem einn þeirra sem tóku þátt í svallinu.

Roquet, sem var þann 14. október ákærður fyrir að stunda hórmang, segir að Strauss-Kahn hafi ekki greitt sjálfur fyrir þjónustu kvennanna né aðrar veitingar sem í boði voru fyrir karlana.

Í tilkynningu frá verktakafyrirtækinu Eiffage í dag kemur fram að Roquet hafi verið vísað frá störfum vegna rannsóknarinnar.

Heimsóttu AGS í boði Strauss-Kahn

Roquet segir að hópurinn hafi síðan farið að heimsækja höfuðstöðvar AGS í Washington í maí 2011 þar sem Strauss-Kahn hafi boðið þeim þangað. 

Spurður um hver hafi borgað flugmiðann segir Roquet að hann hafi gert samkomulag við yfirmann sinn um að greiða 3-4 þúsund evrur af reikningum, samkvæmt frétt Liberation í dag. Ekki kemur fram hver yfirmaðurinn er.

Þegar AFP fréttastofan leitaði til Strauss-Kahn um liðna helgi vegna tengsla hans við vændishringinn sagðist hann vilja ræða við dómara eins fljótt og auðið væri til að binda enda á þessar ásakanir.