Stjórnin styður Papandreou
Ríkisstjórn Grikklands styður ákvörðun forsætisráðherra landsins, George Papandreou, um bera eigi samkomulag um aðstoð ESB við Grikkland undir þjóðaratkvæði.
Ríkisstjórnin kom saman á neyðarfundi í gærkvöldi og sagði Papandreou á fundinum að þjóðaratkvæðagreiðslan myndi gefa stjórnvöldum kost á að fá beint umboð frá almenningi til að takast á við þær niðurskurðaráætlanir sem boðaðar hafa verið og önnur ríki innan evru-svæðisins hafa krafist af hálfu Grikkja.
Papandreou mun hitta aðra leiðtoga Evrópu á fundi síðar í dag í Frakklandi en fregnum af þjóðaratkvæðagreiðslunni hefur víðast verið tekið illa. Á ríkisstjórnarfundinum í gærkvöldi sagði Papandreou samráðherrum sínum að ríkisstjórnin þyrfti á samþykki þjóðarinnar að halda.
Í tilkynningu sem send var út eftir fundinn og greint er frá á vef BBC kemur fram að með þjóðaratkvæðagreiðslunni séu send út skýr skilaboð um stöðu Grikklands innan Evrópu og þátttöku landsins í evru-samstarfinu.
Papandreou segir að ef boðað yrði til þingkosninga með litlum fyrirvara sé sú hætta fyrir hendi að Grikkland fari í þrot en greidd verða atkvæði um vantraust á ríkisstjórnina á gríska þinginu á föstudag.
Ríkisstjórn Papandreous hafði náð samkomulagi um að ESB veitti Grikklandi nýtt lán og að bankar afskrifuðu um helming skulda landsins. Markmiðið með samkomulaginu er að minnka skuldir Grikklands um 100 milljarða evra. Stjórnin samþykkti einnig sparnaðaraðgerðir og skattahækkanir sem hafa mætt mikilli andstöðu í Grikklandi. Stjórnin hyggst meðal annars lækka laun opinberra starfsmanna og lífeyrisgreiðslur, auk þess sem þúsundir ríkisstarfsmanna missa vinnuna. Margir Grikkir telja að Evrópusambandið og Alþjóðagjaldeyrissjóðurinn hafi sett of ströng skilyrði fyrir aðstoðinni. Samkomulagið hefur mætt mikilli andstöðu í flokki Papandreous, sem er vinstri- og miðflokkur. Fylgi flokksins hefur snarminnkað og nokkrir þingmenn hans hafa sagt sig úr honum og gengið til liðs við aðra flokka.
Papandreou kveðst ætla að beita sér fyrir því að Grikkir samþykki björgunaraðgerðirnar í þjóðaratkvæðagreiðslunni en fréttaskýrendur segja að hann hafi tekið mikla áhættu.
Nýleg skoðanakönnun bendir til þess að 58% Grikkja telji að samkomulagið um björgunaraðgerðirnar sé „slæmt“ eða „líklega slæmt“ fyrir Grikkland. Um 72% aðspurðra sögðust hins vegar vera hlynnt því að Grikkland héldi evrunni.
