George Papandreou, forsætisráðherra Grikklands, berst nú í bökkum. Reuters

Fjármálaráðherrar Evruríkjanna munu hittast á morgun og funda um málefni Grikklands. Pressað verður á Grikki að samþykkja þær umbætur sem lagðar hafa verið til. Einnig verður fundað um skuldavanda Ítala.

George Papandreou, forsætisráðherra Grikklands gerir nú allt sem hann getur til að mynda samsteypustjórn og evruríkin halda fast í átta milljarða evra björgunarpakka, þar til samstaða næst í landinu. Þessi björgunarpakki er hluti af 110 milljarða evra pakka, sem samþykktur var í maí. Grikkir þurfa á fénu að halda eigi síðar en um miðjan desember

„Grikkir verða að að sýna að þeim sé alvara með að fara eftir þeim skilyrðum sem við höfum sett, annars fá þeir ekki aðstoð,“sagði Yves Leterme, forsætisráðherra Belgíu í viðtali á sjónvarpsstöðinni RTBF.

Atburðir á Grikklandi hafa fengið ýmsa þjóðarleiðtoga til að missa þolinmæðina; þeir hafa lagt ríka áherslu við Papandreou að hann verði að velja á milli þess að fara úr embætti eða vera áfram á evrusvæðinu.

Herman Van Rompuy, forseti Evrópusambandsins, segir að Grikkjar hafi vissulega unnið í sínum málum, en að gríska þingið verði að samþykkja aðgerðaáætlun ESB ef þeir vilji áframhaldandi stuðning.

Papandreou fundar nú með pólitískum andstæðingum sínum í þeirri von um að samkomulag náist um stjórnarmyndun. Antonis Samaras, sem er leiðtogi stjórnarandstöðunnar, segir að stjórnarmyndun sé möguleg ef Papandreou víki.