Hér má sjá beinagrind, þó ekki alvöru, sem listamaður hefur klætt í fatnað í Guadalajara í Mexíkó. Myndin er úr safni og tengist fréttinni ekki beint. Reuters

Lögreglan í Rússlandi hefur handtekið karlmann sem er grunaður um að hafa grafið upp 29 lík sem hvíldu í kirkjugarði í Nizjnij Novgorod. Talsmaður lögreglunnar segir að maðurinn klætt líkin í föt og notað þau sem stofustáss.

Anatolí Moskvin, sem er 45 ára gamall, var þekktur í bænum fyrir að hafa mikinn áhuga á kirkjugörðum. Þá segir AFP fréttastofan að Moskvin sé sagður vera með doktorsgráðu.

Talsmaður innanríkisráðuneyti héraðsins segir að 28 „brúður“ í mannsstærð hafi fundist í íbúð mannsins. Mosvkin er sagður hafa búið þær til með því að nota fatnað og líkamsleifar sem hann stal úr kirkjugörðum. Líkin voru smurð eins og múmíur.

Eitt lík til viðbótar fannst svo í bílskúr mannsins.

Lögreglan hefur birt myndskeið sem er tekið inni í íbúðinni. Þar má sjá bækur á víð og dreif og haug af litríkum efnum. Þá sést hvernig búið var að setja líkin í eðlilegar líkamsstellingar í íbúðinni.

Myndbandið var birt eftir að lögreglan hafði greint frá því sl. fimmtudag að 20 beinagrindur hefðu fundist heima hjá Moskvin. Það var ekki fyrr en í gær sem lögreglan greindi nánar frá málinu, en um helgina var haldinn Dagur þjóðareiningar í Rússlandi og ekki þótti viðeigandi að greina frá þessu fyrr en eftir hátíðarhöldin.

Lögreglan segir að flestar líkamsleifarnar séu af ungum stúlkum. Eitt lík sést t.d. sitja í sófa með krosslagðar fætur. Hún var klædd í fjólubláan kjól með blúndum og þá var hún í hvítum spariskóm.

Þá má sjá lík klædd í brúðarklæðnað í stofunni. Búið var að hylja andlit allra líkanna og svo virðist sem að eitt líkið sé með dýrshöfuð.

Moskvin er mikill áhugamaður um kirkjugarða og hefur m.a. skrifað bækur slíka garða. Málið fer nú fyrir dómstóla og verði hann fundinn sekur á hann þriggja mánaða fangelsisvist yfir höfði sér.

AFP fréttastofan segir að Moskvin hafi sagt í viðtali, sem var tekið við hann fyrir nokkrum árum, að hann hafi fengið áhuga á kirkjugörðum þegar hann hafi verið ungur vandræðagemlingur. Þá hafi hann fyrir tilviljun orðið vitni að óvenjulegri greftrun sem sértrúarsöfnuður stóð að .

„Síðan þá hafa kirkjugarðar dregið mig að sér líkt og segull,“ sagði hann í viðtalinu, sem blaðakonan Tatiana Kokina-Slavina hefur nú birt á vefsíðu sinni.