Julian Assange. Reuters

Julian Assange, stofnandi Wikileaks, er væntanlegur til Svíþjóðar á næstunni til að svara ákærum vegna nauðgunar og kynferðisbrota. Þetta segir yfirmaður almannatengslafyrirtækisins Ullman í Svíþjóð, en hann segir að Assange hafi ráðið fyrirtækið til að aðstoða sig.

Harald Ullman segist ekki geta sagt til um það hvenær Assange muni fara til Svíþjóðar.

„Við munum aðstoða hann að takast á við fjölmiðlathyglina,“ segir Ullman og bætir því við að fyrirtækið muni hefjast handa þegar í stað við að aðstoða Assange, sem er enn í Bretlandi.

Fyrr í þessum mánuði tapaði Assange, sem er ástralskur ríkisborgari, baráttu sinni gegn því að verða framseldur frá Bretlandi til Svíþjóðar. Frestur til að áfrýja niðurstöðunni til hæstaréttar landsins rennur út 16. nóvember.

Ullmann vildi ekkert gefa upp um það hvort ráðning sín þýddi að Assange hefði gefist upp og mundi því ekki áfrýja málinu.

Björn Hurtig, lögmaður Assange í Svíþjóð, segir í samtali við AFP að hann hafi ekki verið upplýstur um að Assange hafi ráðið almannatengslafyrirtæki til að aðstoða sig.

Tvær sænskar konur sökuðu Assange um nauðgun og kynferðisbrot í ágúst í fyrra. Vilja þarlendir saksóknarar yfirheyra Assange vegna málsins.