Uppreisnarmenn á vegum Al-Shabaab sjást hér sýna vopn sem þeir eru grunaðir um að hafa stolið frá Friðargæsluliði Afríkusambandsins. Reuters

Stjórnvöld í Eþíópíu og Kenýa munu að öllum líkindum ræða í dag möguleikann á því að löndin tvö sendi herlið inn í Sómalíu. Viðræðurnar fara fram á fundi Friðar- og öryggisráðs Afríkusambandsins um ástand þessa stríðshrjáða ríkis.

Ríkisstjórn Kenýa tilkynnti um það í gær að ætlun hennar væri að senda herlið til Sómalíu í þeim tilgangi að styrkja friðargæslulið Afríkusambandsins (AMISOM) þar í landi. Tilkynning ríkistjórnarinnar kom aðeins mánuði eftir að Kenýa sendi her sinn að landamærum Sómalíu til þess að berjast gegn íslömskum uppreisnarmönnum.

„Við skulum bíða og sjá, þeim er velkomið að ræða þetta,“sagði Nissa Roguiai, talsmaður Afríkusambandsins, aðspurð hvort fjallað yrði um fyrrnefndar áætlanir Kenýa á fundinum. Roguiai bætir við að aðildarríki fundarins myndu einnig fjalla um möguleikann á því að Eþíópía sendi herlið til Sómalíu.

Ef Eþíópía sendir herlið til Sómalíu, þá er ekki á hreinu hvort það verður sent þangað undir merkjum AMISOM eða ráðandi þróunarsamtakanna á svæðinu, IGAD. Eþíópía réðst síðast með herlið inn í Sómalíu árið 2006, með blessun Bandaríkjanna, en dró her sinn tilbaka árið 2009.

Friðargæslulið Afríkusambandsins í Sómalíu ræður núþegar yfir um 9.700 hermönnum frá bæði Úganda og Búrúndí. Hlutverk þess er að vernda ríkisstjórn landsins, sem nýtur stuðnings vesturlanda, frá árásum af hálfu öfgafullra uppreisnarmanna sem tilheyra samtökunum Al-Shabaab. Friðargæsluliðið hefur ítrekað óskað eftir því að fá aukalega 3000 hermenn undir sína stjórn í samræmi við þá heimild sem Sameinuðu Þjóðirnar veittu því á síðasta ári.