Angela Merkel, kanslari Þýskalands, og forsætisráðherra Bretalands, David Cameron, áttu fund í Berlín í dag og sögðu að honum loknum að samstaða ríkti um að leysa skuldavanda Evrópu. Leiðtogunum tókst þó ekki að draga dul á það að þau eru ósammála um aðferðir.

Cameron ítrekaði þá afstöðu sína að allar stofnanir evrusvæðisins þyrftu að leggja sitt af mörkum og þar væri Evrópski seðlabankinn ekki undanskilinn.

„Eins og við urðum ásátt um á G20-fundinum þá þurfa allar stofnanir evrusvæðisins að standa að baki gjaldmiðlinum og gera það sem þarf til þess að verja hann - það er það sem þarf að gerast,“ sagði Cameron við blaðamenn.

Merkel hins vegar undirstrikaði þá skoðun sína að bankinn ætti ekki að kaupa ótakmarkað magn ríkisskuldabréfa né að verða lánveitandi til þrautavara.

„Maður ætti að forðast að þykjast hafa völd sem maður hefur ekki,“ sagði hún og ítrekaði þannig ummæli sín frá því fyrr í vikunni þegar hún sagði að Seðlabankinn hefði ekki heimildir til þess að taka að sér þessi hlutverk. „Markaðirnir munu fljótt sjá að það virkar ekki.“

Merkel og Cameron greinir einnig á um skatt á fjármálaviðskipti, svokallaðan Hróa hattar-skatt, en Bretar hafa neitað því að samþykkja slíkan skatt nema hann verði tekinn upp á alþjóðavísu.

Cameron ítrekaði þó að hann hefði fulla trú á því að evrusvæðið fyndi leið út úr ógöngunum. „Þetta eru augljóslega erfiðir tímar - maður sér það á mörkuðunum - en ég vanmet ekki eitt andartak skuldbindingu landa á borð við Þýskaland og annarra innan evrusvæðisins sem vilja láta gjaldmiðilinn virka,“ sagði ráðherrann.

Merkel gerði einnig lítið úr ágreiningnum. „Hvenær sem við David höfum unnið saman að vandamáli höfum við alltaf fundið lausn,“ sagði hún.