Bandarískur karlmaður sem seldi stúlkur og konur í vændi var í Chicago í dag dæmdur í fangelsi fyrir að neyða unglinga sem strokið höfðu að heiman eða voru heimilislaus í vændi. Fórnarlömbin, sem hann neyddi til að kalla sig „pabba“, voru allt niður í þrettán ára gömul.

Datqunn Sawyer, 32 ára, gaf fórnarlömbum sínum öllum ný nöfn sem byrjuðu á stafnum P. Svo sem Precious, Paradise, Pooh, Peaches, Princess, Passion, Pebbles (Bubbles) og Perfect. Ástæðan var sú að gælunafn hans er P-Child. 

Hann lét ekki þar við sitja heldur lét húðflúra mörg fórnarlambanna með gælunafni sínu og bannaði þeim að tala við eða horfa á aðra menn en hann og viðskiptavinina. Ef eitthvert fórnarlambanna braut reglurnar hótaði hann þeim eða beitti þau ofbeldi. Hann beitti einnig fórnarlömbin kynferðislegu ofbeldi og voru þrjár af stúlkunum þungaðar af hans völdum.

Tveir félagar hans voru einnig dæmdir fyrir að aðstoða hann við glæpinn. Það er þeir keyrðu stúlkurnar á þá staði sem þær seldu sig og fylgdust með þeim. Eins stóðu þeir vörð á heimili Sawyer svo það væri tryggt að þær reyndu ekki að flýja.

Allir mennirnir þrír eiga yfir höfði sér allt að ævilangt fangelsi en dómur verður kveðinn upp yfir þeim síðar.