Mótmælandi í Kaíró kastar táragashylki aftur til lögreglumanna. Reuters

Navi Pillay, mannréttindafulltrúi Sameinuðu þjóðanna, fordæmir þau ofbeldisverk sem egypskir öryggissveitarmenn hafa beitt almenning að undanförnu. Pillay segir ljóst að þeir hafi beitt allt of mikilli hörku í átökum sínum við mótmælendur í Egyptalandi.

Fram kemur á vef breska útvarpsins að hún vilji að óháð rannsóknarnefnd verði sett á laggirnar til að rannsaka dauða að minnsta kosti 30 mótmælenda, sem hafa fallið í átökum við lögreglu frá því um liðna helgi.

Mótmælendur, sem vilja koma herforingjastjórninni frá völdum, eru enn á Frelsistorginu í Kaíró í tugþúsundatali. Þeir halda kyrru fyrir þrátt fyrir loforð herforingjastjórnarinnar um að hraða því að koma á nýrri lýðræðislega kjörinni stjórn.

Fimmta daginn í röð hafa götubardagar brotist út í höfuðborginni.

„Ég hvet egypsk stjórnvöld til að hætta að beita því sem er augljóslega of mikil harka gagnvart mótmælendum á Frelsistorginu og annars staðar í landinu. Meðal þess er augljós röng notkun á táragasi, gúmmíkúlum og byssukúlum,“ segir í yfirlýsingu sem Pillay hefur sent frá sér.

„Sumar myndanna sem maður hefur séð frá Frelsistorginu, meðal annars af mótmælendum sem eru barðir hrottalega þrátt fyrir að hafa verið yfirbugaðir, eru mjög átakanlegar,“ segir ennfremur.

Óeirðalögreglumenn við Frelsistorgið í Kaíró í dag. Reuters