„Lögregla, her, fólkið, eru eitt!" hrópuðu þúsundir stuðningsmanna egypska herforingjaráðsins, sem söfnuðust saman í dag, örfáa kílómetra frá mótmælunum á Tahrir-torgi, þar sem fjöldi fólks hefur undanfarna viku kallað eftir endalokum herstjórnarinnar í landinu.

Að minnsta kosti 41 hefur látist og fleiri en 3 þúsund særst í átökum milli lögreglu og mótmælenda á Tahrir-torgi en í Abassiya-hverfi í Kaíró sagðist fólk vera komið með nóg af mótmælum á torginu, hjarta þeirrar byltingar sem kom Hosni Mubarak frá völdum.

„Ég segi við ungmennin í Tahrir: takk en nú er nóg komið. Þið hafið kennt okkur margt en þessu verður að linna,“ sagði Khaled Beshir, 37 ára.

„Ég tók þátt í mótmælunum gegn gömlu stjórninni en fólkið í Tahrir í dag talar ekki fyrir alla Egypta,“ sagði Mohammed Abdelhamid.

Hernum var ákaft fagnað í baráttunni gegn stjórn Mubarak en liggur nú undir ásökunum um að standa fyrir endurbótum. 43% Egypta trúa því að herforingjastjórnin vinni að því að hægja á eða koma í veg fyrir þær umbætur sem farið var fram á í byltingunni.

Aðrir segja að herinn þurfi tíma. „Jafnvel ég, ólæs manneskja, veit að hlutirnir breytast ekki á stuttum tíu mánuðum,“ sagði Amina Hanaf, þriggja barna móðir.