Frá Fílabeinsströndinni Reuters

Skýrsla Barnahjálpar Sameinuðu þjóðanna (UNICEF) og Barnaheilla – Save the Children sýnir að ríflega 1100 konur og börn hafa orðið fyrir ofbeldi á liðnu ári á Fílabeinsströndinni en mikið hættuástand skapaðist í kjölfar kosninga þar. Barni er nauðgað á Fílabeinsströndinni á 36 tíma fresti.

 Frá því að hættuástand skapaðist, í kjölfar kosninga á Fílabeinsströndinni í nóvember 2010, hefur verið tilkynnt 1121 alvarlegt brot á mannréttindum og beinast brotin gegn konum og börnum. Þetta kemur fram í skýrslu sem Barnaheill – Save the Children og Barnahjálp Sameinuðu þjóðanna (UNICEF) hafa birt, í samstarfi við aðra aðila á sviði barnaverndar.

Skýrslan, sem ber nafnið „Varnarleysi, ofbeldi og alvarleg brot á mannréttindum barna – athugun á áhrifum hættuástands í kjölfar kosninga á verndun barna á Fílabeinsströndinni“, tekur til allra brota á mannréttindum, sem tilkynnt var um frá því í nóvember 2010 fram í september 2011.

Þar á meðal eru sex mismunandi tilfelli af alvarlegum brotum á mannréttindum barna; dráp eða limlestingar barna, börn sem þvinguð eru til hermennsku, árásir á skóla og sjúkrahús, nauðganir og annað alvarlegt kynferðisofbeldi gegn börnum, brottnám barna og hindraður aðgangur barna að mannréttindaaðstoð.

Af 1121 mannréttindabroti gegn konum og börnum, beindust 643 gegn börnum, þar af voru 182 nauðganir. Barni er því nauðgað á 36 tíma fresti í landinu.