Almannatenglar gorta sig af því að geta nýtt stjórn Camerons í þágu viðskiptavina sinna. Reuters

Hagsmunaverðir hjá einu stærsta almannatengslafyrirtæki í Bretlandi hafa verið staðnir að því á myndbandsupptökum að gorta sig af því að hafa mikil áhrif á forystumenn í innsta hring breskra stjórnvalda, að David Cameron forsætisráðherra meðtöldum.

Fyrirtækið sem um ræðir heitir Bell Pottinger en það er dagblaðið Independent sem gerir málinu skil. Byggir umfjöllunin á rannsóknarblaðamennsku samtakanna Bureau of Investigative Journalism.

Meðal þess sem almannatenglarnir monta sig af er að hafa getað látið David Cameron ræða við Wen Jiabao, forsætisráðherra Kína, innan sólarhrings eftir að ósk um það var lögð fram. Var tilefnið hagsmunir fyrirtækis sem hefur umsvif í Kína og á í viðskiptum við Bell Pottinger.

Er málið enn eitt ímyndaráfallið fyrir Cameron, nú skömmu eftir að náin tengsl fjölmiðlaveldisins News Corporation við breska Íhaldsflokkinn komust í hámæli.

Þá leiða upptökurnar í ljós að hjá Bell Pottinger er að finna teymi sem „flokkar“ neikvæðar tilvísanir um viðskiptavini þeirra á vefsíðunni Wikipediu. En frjálsa alfræðiritið á að vera óháð hagsmunum fyrirtækja.

Þóttust vera frá Úsbekistan

Vitneskjan um hagsmunagæsluna er niðurstaða rannsóknar þar sem fulltrúar samtakanna, Bureau of Investigative Journalism, þóttust vera erindrekar frá Mið-Asíuríkinu Úsbekistan.

Nokkur almannatengslafyrirtæki neituðu að eiga í samstarfi við mennina og kunna þá að hafa horft til þess að barnaþrælkun viðgengst í Úsbekistan.

Spunameistarar Bell Pottinger tóku vel á móti hinum fjarlægu gestum og gerðum þeim grein fyrir því að hægt væri að styrkja ímynd Úsbekistans án þess að grípa til raunverulegra umbóta. Hægt væri að ná fram sömu markmiðum með því að virkja tengsl í ríkisstjórninni, á breska þinginu og í fjölmiðlum.

Ræðir þar væntanlega meðal annars um myndatökur með leiðtogum og jákvæða umfjöllun í blöðum.

The Times flækist í málið

Segir á vef Independent að hneykslið ýti undir áhyggjur af því að Lundúnir séu að verða miðstöð „ímyndarþvotts“ [e. reputation laundering] og er það orðaleikur við hugtakið peningaþvottur.

Málið hefur snertiflöt við Lundúnablaðið The Times þar sem fram kemur að einn helsti dálkahöfundur þess, Daniel Finkelstein, sé gjarnan á lausu í hádegisverð með viðskiptavinum Bell Pottinger. Þar geti hagsmunaaðilar lýst sínum sjónarmiðum og bundið vonir við að það liti skrif Finkelsteins.

Sýndarskrif í bloggheimum

Spunameistararnir segjast eiga ýmis brögð uppi í erminni til að hafa áhrif á skoðanamótun.

Eitt bragðið er að nota bloggsíður þar sem svo virðist sem hlutlausir aðilar fjalli um tiltekin málefni.

Umrædd skrif væru vilhöll viðskiptavinum og tryggt að þau kæmu upp við leit í leitarvél Google.

Annað bragð er að láta stjórnmálamenn ráðast á blaðamenn sem þykja óæskilegir fyrir hagsmuni tiltekins stjórnmálaafls, í því skyni að draga úr trúverðugleika fjölmiðlamanna.

Draga upp falska mynd af einræðisríki

Meðal viðskiptavina Bell Pottinger eru stjórnvöld í Hvíta-Rússlandi.

Landið er stundum sagt síðasta einræðisríkið í Evrópu og naut stjórn Alexanders Lúkasjenkós góðs af þjónustu almannatenglanna. Fólst herferðin í því að sannfæra fulltrúa Evrópusambandsins um að raunverulegar umbætur hefðu farið fram í Hvíta-Rússlandi, þvert á það sem raunin var.

Talsmaður Camerons neitar því að Bell Pottinger hafi áhrif á stefnu bresku stjórnarinnar.