Forsætisráðherra Svíþjóðar, Fredrik Reinfeldt Reuters

Forsætisráðherra Svíþjóðar, Fredrik Reinfeldt, segir að Svíar styðji ekki að gerðar verði breytingar á Lissabon-sáttmálanum líkt og þau Angela Merkel, kanslari Þýskalands, og Nicolas Sarkozy Frakklandsforseti lögðu til fyrr í vikunni. Leggja þau til að aðildarríki verði beitt refsiaðgerðum nemi halli í ríkisrekstri meira en 3% af landsframleiðslu.

Herman Van Rompuy, forseti leiðtogaráðs Evrópusambandsins, hefur lagt til að reynt verði að greiða úr skuldavanda evrulanda með því að herða reglur sambandsins án þess breyta Lissabon-sáttmálanum.

Reinfeldt er kominn til Brussel þar sem leiðtogafundur Evrópusambandsins hefst í kvöld. Hann segir Svía reiðubúna til þess að ræða mögulegar aðgerðir en hann telji að kjarni vandans sem Evrópa glími við sé efnahagslegur. Það þurfi að taka á þeim vanda strax en breytingar á sáttmálanum séu allt of tímafrekar.

Hann segir að leiðtogarnir eigi miklu frekar að leggja áherslu á að koma á endurbótum í flestum þeirra ríkja sem glíma við skuldavanda. Koma verði í veg fyrir að vandinn breiðist út og kynna stefnur sem koma hagvexti af stað á ný í Evrópu. „Í kvöld bíða bæði markaðir og milljónir Evrópubúa eftir því að leiðtogarnir komi sér saman um lausn á þessari djúpu kreppu,“ sagi Reinfeldt við fréttamenn við komuna til Brussel.

Svíþjóð er ekki hluti af evrusvæðinu en þjóðin hafnaði aðild í þjóðaratkvæðagreiðslu árið 2003.