Lík af karlmanni fannst nýlega í íbúð í fjölbýlishúsi í Randers í Danmörku. Talið er að maðurinn hafi legið látinn í íbúðinni í 1½ ár. Ekki er enn búið að bera formlega kennsl á líkið en talið er að það sé af 58 ára gömlum manni sem bjó í íbúðinni.

Fram kemur á vef Jyllands-Posten, að lögregla hafi ekki heldur getað slegið því föstu hver dánarorsök mannsins sé og því er málið rannsakað formlega sem glæpamál þótt ekki leiki sérstakur grunur á að lát mannsins hafi borið að með voveiflegum hætti.

Lögreglan segir, að maðurinn, sem bjó í íbúðinni, hafi verið eftirlaunaþegi og fengið greidd eftirlaun inn á bankareikning. Hann var einnig með greiðsluþjónustu hjá bankanum og því voru reikningar, svo sem fyrir húsaleigu, rafmagn og hita, greiddir sjálfkrafa. 

Síðast sást til mannsins í apríl árið 2010 og þá tók hann einnig peninga út af bankareikningi síðum.  Nú nýlega sneri forsvarsmaður húsfélags fjölbýlishússins sér til lögreglu vegna þess að vond lykt barst úr íbúð mannsins. Lögreglumenn brutust inn í íbúðina og fundu lík á gólfinu.

Lögreglan hefur eins og áður sagði ekki borið formlega kennsl á líkið. Íbúinn í íbúðinni hafði ekki farið til tannlæknis lengi og því hafa ekki fundist neinar tannlæknaskrár, sem hægt er að bera saman við líkið. Þá hafa DNA-rannsóknir ekki leitt til endanlegrar niðurstöðu. Íbúinn átti enga nána ættingja. Lögregla hefur haft samband við fjarskylda ættingja hans en enginn þeirra hefur átt við hann samskipti.