Eitt útibúa breska stórbankans HSBC. Reuters

Færi svo að Grikkland, Írland og Portúgal yfirgæfu evrusvæðið myndi það leiða til 1% samdráttar á evrusvæðinu á næsta ári og 2,5% samdráttar á árinu 2013. Þetta er mat sérfræðinga fjármálafyrirtækisins Capital Economics í Lundúnum.

Slíkur samdráttur myndi jafngilda áhrifunum af efnahagssamdrættinum á árunum 2008 til 2009 í kjölfar falls Lehman-bankans.

Sérfræðingar UBS-bankans hafa einnig leitast við að áætla áhrifin af kreppu á evrusvæðinu og áætla í bréfi til viðskiptavina sinna að ef evruríki sem höllum fæti stendur, á borð við Grikkland, yfirgæfi evrusvæðið myndi það kosta hvert mannsbarn í viðkomandi ríki 10.000 evrur fyrsta árið og meira til næstu árin.

Í Þýskalandi yrðu áhrifin á bilinu 6.000 til 8.000 evrur, að því er bankinn áætlar.

Á hinn bóginn myndi endurupptaka þjóðargjaldmiðila, þýska marksins, franska frankans eða annars gjaldmiðils, eftir atvikum ýmist leiða til gengisstyrkingar eða gengislækkunar.

Bankastofnanir myndu hrynja

Bent er á ávinninginn fyrir útflutning að taka upp veikari þjóðargjaldmiðil sem þar með myndi gera útflutningsvörur ódýrari. Á móti er tekið fram að lánsfjárkostnaður viðkomandi ríkja geti hækkað.

Áhrifin á bankakerfi umræddra ríkja eru talin mundu verða mikil og hefur AFP eftir ónefndum sérfræðingum að kerfin gætu hrunið í kjölfar þess að fjárfestar misstu trú á gjaldmiðilinn sem tæki við af evrunni.

Þá er Þýskaland sagt mundu missa af útflutningi vegna hærri gengisskráningar og ódýrara gengis í nágrannalöndum og bættrar samkeppnishæfni sem því fylgdi, á kostnað þýsku útflutningsvélarinnar.

Tilbúin ef evrusvæðið gliðnar í sundur

Rætt er við Jacques Cailloux, hagfræðing hjá Royal Bank of Scotland í París, sem bendir á að ef Frakkar yfirgæfu evrusvæðið þyrftu þýskir bankar að horfast í augu við 200 milljarða evra útlán til franskra aðila á nýjum forsendum nýs gjaldmiðils.

Upphæðin væri tífalt hærri í tilfelli bandarískra banka.

Hefur AFP jafnframt eftir Cailloux að breskir bankar og alþjóðafyrirtæki í Asíu séu þegar farin að gera áætlanir fari allt á versta veg á evrusvæðinu.

„Allir munu hafa áætlun vegna þessa möguleika. Það er mál málanna á árinu 2012,“ segir Cailloux.