Newt Gingrich. Reuters

Mitt Romney, sem sækist eftir tilnefningu Repúblikanaflokksins sem forsetaefni í næstu forsetakosningum í Bandaríkjunum, segir að Newt Gingrich, keppinautur hans um útnefninguna, sé of skrítinn til að geta gegnt forsetaembættinu.

„Það er gott í kosningabaráttu að vera kyndugur. Það virkar vel í útvarpsviðtölum. Það er frábært á prenti og er gott lesefni,“ sagði Romney í viðtali við blaðið New York Times.

„En forsetinn þarf að vera leiðtogi. Og slíkur leiðtogi verður að geta sameinað Bandaríkjamenn,“ bætti hann við og gaf til kynna að Gingrich hefði hvorki nauðsynlega skapgerð né þekkingu á efnahagsmálum til að bera. „Við höfum ekkert með afkárahátt að gera í embætti forseta.“

Mitt Romney. Reuters

Gingrich, sem er fyrrverandi forseti bandarísku fulltrúadeildarinnar, virðist nú líklegastur til að hreppa útnefningu Repúblikanaflokksins en hann hefur staðið sig vel í kappræðum frambjóðenda flokksins. Fyrstu forkosningarnar fara fram í Iowa 3. janúar. Romney, sem er fyrrverandi ríkisstjóri í Massachusetts, þótti um tíma sigurstranglegur en á nú á brattann að sækja.

Romney hefur skotið föstum skotum á Gingrich upp á síðkastið. Hann birti í síðustu viku auglýsingu þar sem hann lagði áherslu á fjölskyldugildi en Gingrich er tvífráskilinn og hefur viðurkennt ótryggð í hjónaböndum sínum. 

Þá sagði Romney um helgina, að hann teldi að Gingrich ætti að skila 1,6 milljóna dala þóknun, sem hann fékk fyrir ráðgjafarstörf hjá fasteignasjóðnum Freddie Mac.

Gingrich svaraði að bragði og sagðist glaður myndu hlusta á ráðleggingar Romneys ef hann skilaði öllum þeim fjármunum, sem hann hefði grætt með því að setja fyrirtæki á hausinn og reka starfsmenn.