Hörkumótmæli í Kína bera ávöxt
Íbúar í Wukan fjölmenntu til að hlýða á frásögn talsmanna sinna af samkomulaginu við stjórnvöld í morgun. Þúsundir manna hafa mótmælt í þorpinu daglega undanfarna viku, eftir að hafa rekið lögregluna út úr bænum. Reuters
Yfirvöld í suðurhluta Kína, nánar til tekið Guangdong-héraði, reyna nú að friða borgara eftir óeirðir, sem brutust út vegna eignarnáms ríkisins á landi og fyrirhuguðum virkjanaframkvæmdum. Undanfarna mánuði hefur verið talsvert um mótmæli í Guangdong-héraði, sem er eitt það ríkasta í Kína, þar sem fólk af hinni nýju kínversku millistétt reynist mun viljugra en áður til þess að mótmæla stefnu kommúnistaflokksins, í málum allt frá mengunarvörnum til spillingar meðal embættismanna.
Í dag voru viðræður milli héraðsstjórnarinnar og fulltrúa íbúa í fiskimannaþorpinu Wukan, sem orðið hefur þyrnir í augum stjórnvalda að undanförnu. Þar reyndu þau að sannfæra íbúa þorpsins um að láta af andstöðunni.
Aðstoðarritari kommúnistaflokksins í héraðinu, Zhu Mingguo að nafni, samþykkti þar að leysa þrjá þorpsbúa úr varðhaldi, sem handteknir voru 9. desember síðastliðinn og að láta af hendi lík þess fjórða, Xue Jinbo, sem lést í haldi lögreglu, til ættingja hans. Dauði hans hefur valdið einna mestri reiði. Talsmaður þorpsbúa, Lin Zulian greindi frá þessu við fjölmiðla.
Lin sagðist mjög ánægður með útkomuna úr viðræðunum, en niðurstaðan varð einnig sú að umsátri lögreglunnar um Wukan, sem staðið hefur síðan mennirnir voru handteknir, er lokið og að tíu manna nefnd frá stjórnvöldum fer til þorpsins til þess að grennslast fyrir um óánægju um umkvartanir þorpsbúanna.
„Þetta er ekki sigur, en þetta er ágætis byrjun," sagði Lin. Sú ákvörðun að senda nefndina til að ræða við þorpsbúa um óánægju þeirra þykir til marks um hversu alvarlega héraðsstjórnin taki mótmælin.
Þau voru byrjuð að breiðast út, en íbúar nærliggjandi bæjar, Haimen, lentu í átökum við lögreglu í gærmorgun, eftir að hafa ráðist inn í stjórnarbyggingu í bænum til að mótmæla fyrirætlunum um að stækka kolaraforkuver þar, sem íbúarnir segja að valdi þeim heilsutjóni.
Hvorki mótmælin í Wukan né Haimen hafa fengið mikla umfjöllun í ríkisfjölmiðlunum kínversku, en þar sem bæirnir eru mjög nálægt Hong Kong, þar sem frjálsir fjölmiðlar starfa, hafa fréttir af atburðunum fljótt spurst út og því valdið kommúnistaflokknum áhyggjum.
Sjónarvottar hafa tjáð AFP að nokkrir hafi látist í aðgerðum lögreglu gegn mótmælendum, þar á meðal fimmtán ára gamall drengur og miðaldra kona.
