Míkhaíl Khodorkovskí. Reuters

Sérstök nefnd, sem veitir rússneskum stjórnvöldum ráðgjöf um mannréttindamál, hvetur saksóknara til að ógilda dóm, sem kveðinn var upp nýlega yfir Mikhaíl Khodorkovskí, fyrrum forstjóra olíufélagsins Yukos, en samkvæmt dómnum var fangelsisvist Khodorkovskís lengd til ársins 2016.

Khodorkovskí og viðskiptafélagi hans, Platon Lebedev, voru handteknir árið 2003 og ákærðir og dæmdir fyrir skattsvik. Réttað var yfir þeim að nýju á síðasta ári, skömmu áður en láta átti þá lausa og þeir dæmdir í áframhaldandi fangelsi fyrir peningaþvætti og fjársvik. Khodorkovskí hefur ávallt neitað sök.

Khodorkovskí hafði gagnrýnt Vladímír Pútín, þáverandi forseta Rússlands, harðlega áður en hann var handtekinn. Áður en síðari dómurinn var kveðinn upp á síðasta ári sagði Pútín sem þá var forsætisráðherra Rússlands. „Þjófurinn verður að vera í fangelsi."

Ráðgjafarnefndin segir í 300 blaðsíðna langri skýrslu að dómurinn í fyrra byggist ekki á rússneskum hegningarlögum. Nefndin var stofnuð í febrúar að frumkvæði Dmitrís Medvedevs, forseta Rússlands.

Pútín sagði í síðustu viku að yrði hann kjörinn forseti á ný í mars mundi hann skoða hvort ástæða væri til að náða Khodorkovskí.