Stjórnarandstæðingar fjölmenntu í jarðarför mótmælanda sem lést í átökum í Damaskus. Reuters

Eftirlitsmenn frá Arababandalaginu eru væntanlegir til Sýrlands í dag en þeir hafa það verkefni að stuðla að friði í landinu og binda enda á ofbeldisverk stjórnarhermanna gagnvart mótmælendum, sem vilja koma ríkisstjórninni frá völdum.

Hluti hópsins, um 30 eftirlitsmenn, kemur til Sýrlands í dag og eru fréttamenn með þeim í för, að því er fram kemur á vef breska ríkisútvarpsins.

Eftirlitsmennirnir munu undirbúa komu annarra úr sendinefndinni, sem eru væntanlegir til landsins næsta sunnudag. Talið er að heildarfjöldi eftirlitsmanna í landinu verði um 150. Þeir hafa fengið einn mánuð til að stuðla að friði í landinu, en hægt verður að framlengja umboð þeirra um einn mánuð til viðbótar náist samkomulag um það á milli stríðandi fylkinga.

Verkefni eftirlitsmannanna er að fylgjast með því að stjórnvöld í Sýrlandi fari eftir þeim aðgerðum sem Arababandalagið samþykkti til að stuðla að friði í landinu. Bandalagið hefur kallað eftir því að árásir verði stöðvaðar, að hermenn hörfi af götum borga og mótmælendum verði sleppt úr haldi.

Sl. mánudag gáfu sýrlensk stjórnvöld eftirlitsmönnunum grænt ljós á að koma til landsins eftir að hafa tafið málið vikum saman.

Sameinuðu þjóðirnar segja að rúmlega 5.000 hafi fallið í Sýrlandi frá því mótmælin gegn stjórn Bashars al-Assads Sýrlandsforseta hófust í mars sl. Mannréttindasamtök segja aftur á móti að talan sé mun hærri, að því er segir á vef BBC.

Stjórnvöld í Damaskus, höfuðborg Sýrlands, segja að vopnuð gengi beri ábyrgð á óöldinni sem vilji koma á óstöðugleika í landinu.

Mjög er þrýst á að Rússar hraði vinnu við gerð ályktunar í öryggisráði SÞ þar sem ofbeldisverkin eru fordæmd. Stjórnvöld í Rússlandi komu vestrænum embættismönnum á óvart í síðustu viku með því að kynna drög á ályktun þess efnis, en lítið hefur þokast við gerð ályktunarinnar síðan.

Stjórn Sýrlandsforseta á sína stuðningsmenn sem hafa komið saman á fjöldafundum í höfuðborginni. Reuters