Franskur lýtalæknir heldur á gölluðum sílíkonpúða frá PIP, sem hann fjarlægði úr konu 21. desember síðastliðinn. Reuter

Franska heilbrigðisráðuneytið sendi frá sér tilkynningu í dag þar sem segir að sílíkonpúðar frá fyrirtækinu Poly Implant Prothese auki ekki líkurnar á krabbameini. Var þeim 30 þúsund konum sem fengu slíka sílíkonpúða í Frakklandi engu að síður ráðlagt að láta fjarlægja þá.

Þrátt fyrir að átta krabbameinstilfelli hafi greinst á meðal kvenna í Frakklandi, sem í voru græddir sílíkonpúðar frá PIP, sagði í tilkynningunni að þær séu ekki í meiri áhættu en aðrir að fá krabbamein. Það hafi hins vegar verið sannað að púðarnir frá hinum gjaldþrota framleiðanda eigi það frekar til að rifna en aðrir sílíkonpúðar.

Heilbrigðisráðherrann, Xavier Bertrand, sagði engu að síður að það að láta fjarlægja púðana væri fyrirbyggjandi aðgerð en ekki lífsnauðsynleg.

PIP var lokað og vörur þess bannaðar þegar í ljós kom að fyrirtækið hafði notað óleyfilegt iðnaðarsílíkon í stað hreins sílíkons í púðana, sem aftur olli því að púðarnir rifnuðu oftar en aðrir sílíkonpúðar.

Tugir þúsunda kvenna í fleiri en 65 löndum hafa gengist undir brjóstaaðgerðir þar sem notaðir voru púðar frá PIP, flestar í Suður-Ameríku og Vestur-Evrópu. Fleiri en 2.000 konur hafa sett sig í samband við saksóknara í Marseille, sem hefur hafið rannsókn á fyrirtækinu.

Lögmaður fyrirtækisins, Yves Haddad, segir hins vegar engar sannanir tengja púðana við sjúkdóma eða veikindi.