Auglýsingamynd fyrir bandarísku kvikmyndina „Snakes On A Plane“ frá árinu 2006 en hún fjallaði um svipað málefni. Mynd tekin af vef Wikipedia.

Tékkneskur ríkisborgari var handtekinn í Argentínu þegar hann reyndi að komast um borð í flugvél með ferðatösku fulla af lifandi dýrum. Um það bil 247 dýr fundust í ferðatösku mannsins, þar á meðal eitraðir snákar og nokkrar tegundir skriðdýra sem eru í útrýmingarhættu.

Maðurinn, sem heitir Karel Abelovsky, var handtekinn af tollvörðum þegar hann reyndi að komast um borð í flugvél sem var á leiðinni til Madrid, höfuðborgar Spánar. Starfsmenn Ezeiza flugvallarins í Buenos Aires eru sagðir hafa orðið fyrir áfalli þegar þeir sáu fjölda lifandi dýra við röntgenskoðun á töskunni.

Þegar starfsmennirnir opnuðu töskuna fundu þeir rúmlega 200 skrið- og lindýr, þar á meðal um 9 tegundir af baneitruðum snákum sem búið var að koma fyrir í plastumbúðum. Þar að auki fundust um 15 tegundir af eitruðum höggormum sem geta orðið allt að eins og hálfs metra langir, en einnig fundust nokkrar ungar kyrkislöngur í töskunni.

Sum dýranna sem fundust eru mjög sjaldgæf og jafnframt vernduð af Samningnum um alþjóðaverslun með tegundir villtra dýra og plantna sem eru í útrýmingarhættu (CITES). Tvö dýranna voru látin þegar þau fundist en flest hinna dýranna hefðu hlotið sömu sömu örlög og látist vegna súrefnisskorts ef taskan hefði farið í farangursrými flugvélarinnar.

Abelovsky var handtekinn þann 7. desember síðastliðinn en lögregluyfirvöld í Argentínu greindu fyrst frá málinu í dag. Abelovsky hefur nú verið ákærður fyrir tilraun til smygls og á frammi fyrir sér 10 ára fangelsisdóm ef hann verður sakfelldur.

Grunur leikur á að Abelovsky tengist alþjóðlegum smyglhring.