Sílikon-púði fjarlægður úr franskri konu fyrir skömmu Reuters

Stjórnvöld í Venesúela hafa boðið konum sem láta fjarlægja sílikon-púða frá franska fyrirtækinu Poly Implant Prothese (PIP) úr brjóstum sínum að greiða fyrir aðgerðina. 

Þrátt fyrir að stjórnvöld greiði fyrir skurðaðgerðina munu þau ekki greiða fyrir ísetningu nýrra sílikon-púða í stað þeirra sem eru fjarlægðir.

Á vef BBC er haft eftir heilbrigðisráðherra Venesúela, Eugenia Sader, að í mörgum tilvikum þar sem læknar hafa notað PIP púða við brjóstastækkanir hafi púðunum verið smyglað inn í landið.

Frönsk yfirvöld hafa mælt með því að 30 þúsund konur þar í landi láti fjarlægja sílikon-púða frá PIP úr brjóstum sínum í varúðarskyni þar sem þeir geti ógnað heilsu þeirra. Svo virðist sem sílikonið sem notað var í púðana sé ekki hreint sílikon heldur iðnaðarsílikon. Ekki sé aukin hætta á krabbameini fylgi púðunum líkt og ýmsir hafa haldið fram. Frönsk yfirvöld hafa jafnframt boðist til þess að greiða fyrir slíkar skurðaðgerðir.

PIP púðarnir voru bannaðir í nokkrum löndum á síðasta ári eftir að í ljós kom að um iðnaðarsílikon er að ræða í þeim og því meiri hætta á að þeir rofni.

Í Frakklandi er hafin rannsókn á starfsemi PIP en fyrirtækið fór í þrot á síðasta ári.

Sader segir í viðtali við BBC að þær konur sem hafa áhyggjur af sílikoni í brjóstum sínum eigi að fara á sjúkrahús í rannsókn og þær geti síðan farið í skurðaðgerð og látið fjarlægja þá án kostnaðar.

Brjóstastækkanir eru afar vinsælar í Venesúela og í einhverjum tilvikum eru stúlkum gefnar slíkar í fimmtán ára afmælisgjöf.

Talið er að yfir 300 þúsund brjóstapúðar frá PIP hafi verið seldir í heiminum síðastliðin tólf ár í 65 löndum. Yfir helmingurinn fór til ríkja í Suður-Ameríku.